آئی فون 17 پرو میکس کے صارفین کے لیے خوشخبری ہے کہ اب پی ٹی اے ٹیکس کی یک مشت ادائیگی کے بجائے اسے آسان ماہانہ اقساط میں ادا کیا جا سکے گا۔
بینک الفلاح کے ای-کامرس پلیٹ فارم الفا مال نے صارفین کے لیے یہ سہولت متعارف کرائی ہے، جس کے تحت آئی فون 17 پرو میکس کا پی ٹی اے ٹیکس 3 سے 36 ماہ کی اقساط میں ادا کیا جا سکتا ہے۔
الفا مال کے مطابق ماہانہ اقساط کی شروعات 10,825 روپے سے ہوگی، جبکہ قلیل مدتی منصوبے (3 یا 6 ماہ) بغیر سود کے دستیاب ہیں۔ طویل المدتی اقساط (9 سے 36 ماہ) پر معمولی 2.5 فیصد مارک اپ عائد ہوگا۔
یہ سہولت خاص طور پر ان صارفین کے لیے مددگار ثابت ہوگی جو درآمد شدہ آئی فونز کو پی ٹی اے کے تحت رجسٹر کرانا چاہتے ہیں لیکن بھاری ٹیکس کی یک مشت ادائیگی نہیں کر سکتے۔
درخواست کے لیے صارفین کو الفا مال کی ویب سائٹ پر جا کر اپنے آئی فون کا آئی ایم ای آئی نمبر، اپنا نام اور شناختی کارڈ نمبر درج کرنا ہوگا، اور پھر بائے ناؤ، پے لیٹر کا آپشن منتخب کر کے مطلوبہ ادائیگی پلان کا انتخاب کرنا ہوگا۔
