پاکستانی انٹرٹینمنٹ انڈسٹری سے وابستہ معروف اداکار اور ہدایت کار یاسر حسین نے ڈی ایچ اے کا علاقہ چھوڑ کر شہر کے عام علاقے میں رہنے کی وجہ بتادی۔
حال ہی میں اداکار نے ایک پوڈکاسٹ میں شرکت کی جہاں انہوں نے بچوں کی تربیت سے متعلق کھل کر گفتگو کی۔
ایک سوال کا جواب دیتے ہوئے انہوں نے بتایا کہ کبیر حسین کی تربیت کی خاطر پوش علاقہ چھوڑ کر عام علاقے میں رہائش اختیار کی کیونکہ میں چاہتا تھا کہ میرا بچہ اسی طرح گلی محلے میں کھیلے جس طرح میں اپنے بچپن میں کھیلا کرتا تھا۔
انہوں نے کہا کہ میں یہ نہیں کہتا کہ پوش علاقے کے بچے کھیلتے نہیں ہیں، وہ پلے ہاؤس میں جا کر کھیلتے ہیں جہاں اے سی لگا ہوتا ہے، ان بچوں کا آپس میں اس طرح میل جول نہیں ہوتا لیکن اب کبیر باہر کھیلتا ہے تو پسینے پسینے ہو جاتا ہے، گلی کے بچوں کے ساتھ میل جول ہے وہ ہمارے گھر آتے ہیں، اسے باقاعدہ گلی محلے کا ماحول مل رہا ہے۔
یاسرر حسین کا کہنا ہے کہ میرا بیٹا آج بھی اولڈ اسکول ہے، وہ مٹی میں کھیلتا ہے، ریت سے گھر بناتا ہے، یہ پوش علاقے میں ممکن نہیں تھا۔