پاکستان میں سٹار لنک سیٹلائٹ انٹرنیٹ کی لانچنگ کی تصدیق ہو گئی

اسلام آباد (ویب ڈیسک) پاکستان میں سٹار لنک سیٹلائٹ انٹرنیٹ کی لانچنگ کی تصدیق ہو گئی اور اس سلسلے میں ذرائع نے بتایاکہ پاکستان پہلی سیٹلائٹ پر مبنی انٹرنیٹ سروس شروع کرنے کی تیاری کر رہا ہے اور ایلون مسک کی کمپنی اس سال کے آخر تک ملک میں کام شروع کر دے گی۔
نیوزویب سائٹ پروپاکستانی کے مطابق سٹار لنک نے پاکستان کے قوانین اور ریگولیٹری فریم ورک کے تحت کام کرنے پر آمادگی ظاہر کی ہے اور پہلے ہی رجسٹریشن کے لیے درخواست جمع کراچکی ہے۔ 
ذرائع کے حوالے سے مزید بتایاگیا ہے کہ پاکستان سپیس ایکٹیویٹیز ریگولیٹری بورڈفی الحال عالمی سطح کے ایک سیٹلائٹ ریگولیٹری فریم ورک کو حتمی شکل دے رہا ہے، جو سیٹلائٹ انٹرنیٹ سروس فراہم کرنے والوں کو لائسنس دینے کی بنیاد کے طور پر کام کرے گا۔ فریم ورک مکمل ہونے کے بعد سٹار لنک باضابطہ طور پر رجسٹر ہو جائے گی جس کے بعد پاکستان ٹیلی کمیونیکیشن اتھارٹی (PTA)کی طرف سے آپریشنل لائسنس جاری کیا جائے گا۔
یادرہے کہ تیاری کے طور پر P-SARB نے حال ہی میں ایک مقامی ہوٹل میں سیٹلائٹ کمپنیوں کے ساتھ ایک ورکشاپ کا انعقاد کیاجس میں وفاقی وزیر برائے آئی ٹی شازہ فاطمہ خواجہ نے شرکت کی۔ شنگھائی ٹیلی کام، ایمیزون اور ون ویب سمیت کئی صنعتی اداروں نے بھی پاکستان میں سیٹلائٹ انٹرنیٹ آپریشنز کے لیے رجسٹریشن میں دلچسپی ظاہر کی ہے تاہم سٹارلنک وہ پہلی کمپنی ہے جس نے ترقی پذیر فریم ورک کے تحت باضابطہ طور پر درخواست دی ہے۔
قیاس آرائیاں کی جا رہی ہیں کہ ایلون مسک اس سال کے آخر میں پاکستان میں ہونے والی لانچنگ تقریب میں ذاتی طور پر شرکت کر سکتے ہیں،یہاں یہ امر بھی قابل ذکر ہے کہ سٹار لنک پہلے سے ہی جنوبی ایشیا کے دیگر ممالک میں کام کر رہا ہے، توقع ہے کہ پسماندہ اور دوردراز علاقوں سمیت پاکستان بھر میں انٹرنیٹ کنیکٹیویٹی اور ڈیجیٹل انفراسٹرکچر کو نمایاں طور پر بڑھا دے گا۔