لاہور (ڈیلی پاکستان آن لائن)پاکستان ٹیلی کمیونیکشن اتھارٹی (پی ٹی اے) نے کہا ہے کہ پالیسی کے تحت اوورسیز پاکستانیوں کے لیے 120 دن کی ایف بی آر ٹیکس فری موبائل رجسٹریشن کی سہولت ہے۔جسے اوورسیز خود کار طریقے سے DIRBS پورٹل پر رجسٹرڈ کروا کر حاصل کر سکتے ہیں جس کیلئے کسی دفتر کے چکر لگانے کی بھی ضرورت نہیں ۔
سماجی رابطے کی ویب سائٹ ایکس پر جاری بیان میں پی ٹی اے کا کہنا تھا کہ پاکستان میں اپنے ہر دورے کے دوران اوورسیز پاکستانیوں کو فیڈرل بورڈ آف ریونیو (ایف بی آر) کی پالیسی کے تحت 120 دن کے لیے موبائل ڈیوائسز کی ایف بی آر ٹیکس فری رجسٹریشن کی سہولت حاصل ہے۔
واضح رہے کہ پاکستان ٹیلی کمیونیکیشن اتھارٹی (پی ٹی اے) اس سہولت کی فراہمی مفت اور خودکار عارضی موبائل رجسٹریشن سسٹم کے ذریعے کر رہا ہے، جو DIRBS پورٹل پر دستیاب ہے
اوور سیز پاکستانی موبائل رجسٹر کرنے کیلئے اس ویب سائٹ پر وزٹ کر سکتے ہیں: https://dirbs.pta.gov.pk/drs
مزید کہنا تھا کہ اس اقدام کا مقصد پاکستان میں مختصر قیام کے دوران بلاتعطل موبائل کنیکٹیویٹی کی سہولت کی عملی فراہمی کو یقینی بنانا ہے، جو پی ٹی اے کے اُس عزم کا مظہر ہے کہ وہ تمام زائرین کے لیے ڈیجیٹل رسائی کو آسان اور مؤثر بنائے۔