امریکی صدر ڈونلڈ ٹرمپ نے کہا کہ غزہ پر اسرائیلی فضائی حملوں کے بعد اسرائیل اور حماس کا سیز فائر معاہدہ اب بھی برقرار ہے۔
غیرملکی میڈیا کے مطابق امریکی صدر ڈونلڈ ٹرمپ نے اپنے خصوصی طیارے ائیرفورس ون میں صحافیوں سے غزہ میں جنگ بندی کی خلاف ورزی کی ممکنہ ذمہ داروں کے حوالے سے بات کی۔
ڈونلڈ ٹرمپ نے کہا کہ حماس کے کچھ باغیوں کی جانب سے سیز فائر معاہدے کی خلاف ورزی کی گئی ہے، تاہم انہیں امید ہے حماس اس میں شامل نہیں تھی۔
انہوں نے کہا کہ’ ہم اس معاملے کا باغور جائزہ لے رہے ہیں اور اس کو سختی سے نبٹائیں گے‘۔
امریکی صدر نے کہا کہ انہیں امید ہے کہ جنگ بندی برقرار رہے گی اور اس سے معاملات کو بہتر کرنے میں مدد ملے گی۔
دوسری جانب اسرائیل نے فلسطینی مزاحمتی گروپ حماس پرساری ذمہ داری ڈالتے ہوئے کہا کہ حماس کی جانب سے رفح میں اس کی فوج پر فائرنگ کی گئی ہے جس کے نتیجے میں اس کے 2 فوجی مارے گئے ہیں۔
مزاحمتی تنظیم حماس نے جنگ بندی معاہدے پر اسرائیلی خلاف ورزی کے باوجود اس کی پاسداری کا اعلان کیا ہے لیکن ساتھ میں خدشے کا اظہار بھی کیا ہے کہ صورتحال کو مکمل تباہی کی جانب مت دکھیلا جائے۔
یہ بتاتے چلیں کہ غزہ میں حالیہ اسرائیلی فضائی حملوں میں 44 فلسطینی شہید ہوگئے۔