آزاد کشمیر سے بھی افغان مہاجرین کو بے دخل کرنے کا فیصلہ

مظفرآباد (ڈیلی پاکستان آن لائن)  آزاد جموں و کشمیر میں مقیم افغان مہاجرین کی بے دخلی کے لیے 18 نومبر 2025 کی حتمی تاریخ مقرر کر دی گئی ہے۔

آئی جی پولیس آزاد کشمیر کے مطابق، ڈی آئی جیز اس آپریشن کی براہِ راست نگرانی کریں گے، جبکہ ایس ایس پیز اور ایس پیز اپنے اضلاع میں افغان شہریوں کی طورخم بارڈر تک بے دخلی کے ذمہ دار ہوں گے۔

آئی جی نے ہدایت دی کہ 18 نومبر تک تمام اضلاع کے پولیس افسران اس بات کی تصدیق کریں کہ ان کے علاقے میں کوئی افغان شہری مقیم نہیں ہے۔

انہوں نے خبردار کیا کہ مقررہ تاریخ کے بعد اگر کسی ضلع یا علاقے میں کوئی افغان مہاجر پایا گیا تو متعلقہ افسر کو معطل کر کے اس کے خلاف مزید کارروائی کی جائے گی۔

آئی جی پولیس نے مزید ہدایت دی کہ تمام ایس ایس پیز اور ایس پیز افغان مہاجرین کی بے دخلی سے متعلق اپنی روزانہ کی رپورٹس مرکزی پولیس دفتر کو ارسال کریں۔