شارٹ ویڈیو شیئرنگ ایپ ٹک ٹاک نے سال 2025 کی دوسری سہ ماہی میں پاکستان میں 2 کروڑ 55 لاکھ کے قریب نامناسب اور کمیونٹی گائیڈ لائنز کے خلاف ویڈیوز از خود حذف کر دی ہیں۔
ٹک ٹاک کی کمیونٹی گائیڈلائنز انفورسمنٹ رپورٹ کے مطابق اپریل تا جون 2025 کے دوران پاکستان میں حذف شدہ ویڈیوز کی شرح 99.7 فیصد رہی، اور ان میں سے 96.2 فیصد ویڈیوز اپلوڈ ہونے کے 24 گھنٹوں کے اندر ہی ہٹا دی گئیں۔
عالمی سطح پر ٹک ٹاک نے اس سہ ماہی میں مجموعی طور پر تقریباً 19 کروڑ ویڈیوز ڈیلیٹ کیں، جو کل اپلوڈ کیے گئے کانٹینٹ کا تقریباً 0.7 فیصد بنتی ہیں۔
حذف شدہ ویڈیوز میں 163,962,241 ویڈیوز خودکار ٹیکنالوجی سے نشاندہی پر ہٹائی گئیں، جبکہ 7,457,309 ویڈیوز بعد از جائزہ دوبارہ بحال کی گئیں۔
رپورٹ میں بتایا گیا کہ ٹک ٹاک نے اپنی ساکھ برقرار رکھنے کے لیے 76,991,660 جعلی اکاؤنٹس اور 25,904,708 شبہ شدہ کم عمر (13 سال سے کم) صارفین کے اکاؤنٹس بھی حذف کیے۔
ٹاک ٹاک کے مطابق عالمی سطح پر حذف کی گئیں ویڈیوز کا ایک بڑا حصہ یعنی 30.6 فیصد ایسے حساس یا بالغ کانٹینٹ پر مشتمل تھا جو ٹک ٹاک کی پالیسیوں کے مطابق نہیں تھا۔
اس کے علاوہ 14.0 فیصد ویڈیوز نے پلیٹ فارم کے حفاظتی اور شائستگی کے معیار کی خلاف ورزی کی جبکہ 6.1 فیصد ویڈیوز رازداری اور سیکیورٹی سے متعلق ہدایات کے برخلاف تھیں۔
مزید برآں حذف کی گئیں 45.0 فیصد ویڈیوز کو غلط معلومات کے طور پر رپورٹ کیا گیا تھا اور 23.8فیصد ویڈیوز ایڈیٹ کردہ میڈیا یا مصنوعی ذہانت (اے آئی) سے تیار کردہ کانٹینٹ پر مشتمل تھیں۔