راولپنڈی(ڈیلی پاکستان آن لائن)جنوبی افریقا کے خلاف دوسرے ٹیسٹ کے تیسرے کے دن اختتام پر پاکستان نے دوسری اننگز میں 4 وکٹ پر 94 رنز بنالیے ہیں۔راولپنڈی کرکٹ اسٹیڈیم میں کھیلے جارہے میچ میں فی الحال پاکستان نے جنوبی افریقا پر 23 رنز کی برتری حاصل کرلی ہے لیکن میچ پر اُس کی گرفت کافی حد تک کمزور ہوگئی ہے۔تیسرے دن کے اختتام پر بابر اعظم 49 اور محمد رضوان 16 رنز کے ساتھ کریز پر موجود ہیں جبکہ اوپنر امام الحق 9، عبداللّٰہ شفیق 6، سعود شکیل 11 اور کپتان شان مسعود بغیر کوئی رنز بنائے پویلین لوٹ چکے ہیں۔
اس سے قبل جنوبی افریقا نے پاکستان کے خلاف پہلی اننگز میں 404 رنز بنائے تھے اور میزبان ٹیم پر 71 رنز کی برتری حاصل کی تھی۔راولپنڈی میں کھیلے جارہے ٹیسٹ میچ کے تیسرے دن جنوبی افریقہ نے شاندار کم بیک کیا، 210 پر 7 وکٹیں گرنے کے باوجود متوسوامی اور کیشو مہاراج نے اچھی پارٹنر شپ قائم کی۔ جنوبی افریقہ نے آخری 3 وکٹوں پر 194 رنز کا اضافہ کیا۔ آخری وکٹ پر متوسامی اور رباڈا نے 98 رنز بنائے جبکہ نویں وکٹ پر متوسامی اور کیش مہاراج نے 71 رنز کا اضافہ کیا۔ راولپنڈی ٹیسٹ کے تیسرے دن جنوبی افریقہ نے پہلی اننگز کا آغاز 4 وکٹ پر 185 رنز سے کیا۔ تیسرے دن کے آغاز میں ہی آصف آفریدی نے پاکستان کو کامیابی دلوائی۔ مہمان ٹیم کی پانچویں وکٹ 185 رنز پر گری۔
جنوبی افریقہ کی چھٹی وکٹ 204 رنز پر گری، یہ وکٹ بھی آصف آفریدی کے حصے میں آئی، 6 رنز کے اضافے کے بعد مہمان ٹیم کے ساتویں کھلاڑی بھی پویلین لوٹ گئے، یہ وکٹ بھی آصف آفریدی کے حصے میں آئی۔مہمان ٹیم کے آٹھویں کھلاڑی 235 رنز پر آؤٹ ہوئے، اس بار نعمان علی نے وکٹ حاصل کی۔ جس کے بعد جنوبی افریقہ کے بیٹرز نے ذمے داری کا مظاہرہ کرتے ہوئے اسکور 306 رنز پر پہنچایا تو ان نویں وکٹ گر گئی۔ نمعان علی نے کیشو مہاراج کو آؤٹ کیا۔جنوبی افریقہ کے آخری آؤٹ ہونے والے کھلاڑی رباڈا تھے انہوں 71 رنز کی باری کھیلی تھی، انہیں آصف آفریدی نے آؤٹ کیا تھا۔ڈیبیو کرنے والے آصف آفریدی نے 6 کھلاڑیوں کو آؤٹ کیا جبکہ دو وکٹیں نعمان علی اور ایک ایک وکٹ شاہین شاہ آفریدی اور ساجد خان نے حاصل کی۔
اس سے قبل جنوبی افریقہ نے پہلی اننگز کا آغاز کیا تو 54 رنز پر ریان ریکلٹن اور ایڈین مارکرم آؤٹ ہوگئے، تیسری وکٹ پر اسٹبس اور زورزی نے 113 رنز کی شراکت قائم کی، زورزی 55 رنز بناکر ٹیسٹ کرکٹ میں آصف آفریدی کا پہلا شکار بنے۔
پاکستانی ٹیم پہلی اننگز میں 333 رنز بناکر آؤٹ ہوگئی تھی۔پاکستان کی جانب سے کپتان شان مسعود 87، سعود شکیل 66، عبداللّٰہ 57 رنز بنا نمایاں رہے جبکہ سلمان علی آغا نے 45 رنز کی اننگز کھیلی۔واضح رہے کہ پہلے سیریز کے پہلے ٹیسٹ میچ میں پاکستان نے دفاعی چیمپئن جنوبی افریقہ کو 93 رنز سے شکست دے کر ورلڈ ٹیسٹ چیمپئن شپ (ڈبلیو ٹی سی) 27-2025 میں فاتحانہ آغاز کیا تھا۔