اسلام آباد ( ڈیلی پاکستان اان لائن )صدر مملکت آصف علی زرداری نے بیگم نصرت بھٹو کو ان کی 14 ویں برسی پر اپنے خصوصی پیغام میں ملک میں جمہوریت کے لیے جدوجہد میں ان کی جرأت اور گرانقدر خدمات کو سراہا ہے۔
ایوان صدر کے پریس ونگ کے مطابق صدر مملکت نے کہا کہ بیگم نصرت بھٹو نے مشکل حالات میں ثابت قدمی اور عزم کا مظاہرہ کیا، ان کا حوصلہ اور استقامت قوم کے لیے مشعل راہ ہے۔ انہوں نے کہا کہ بیگم نصرت بھٹو نے شہید ذوالفقار علی بھٹو کے ساتھ جمہوریت کی جدوجہد میں نمایاں کردار ادا کیا اور تحمل اور عزم کے ساتھ تحریک کی قیادت کی۔
’’این این آئی ‘‘ کے مطابق صدر مملکت نے کہا کہ بیگم نصرت بھٹو نے مشکل وقت کا ہمت کے ساتھ سامنا کیا اور جمہوری اقدار پر کاربند رہیں، بیگم نصرت بھٹو کی استقامت قوم کو جمہوری اصولوں کو برقرار رکھنے اور مزید جامع معاشرے کے لیے کام کرنے کی ترغیب دیتی رہے گی۔
صدر مملکت نے مرحومہ کے درجات کی بلندی کے لیے دعا کی۔