مائیکروسافٹ کا کہنا ہے کہ کام کی جگہ پر صرف انسانوں کا انتظام کافی نہیں، بلکہ مصنوعی ذہانت (اے آئی) کے ایجنٹس کو بھی مینیجر کی ضرورت ہوتی ہے۔ رائٹرز کی رپورٹ کے مطابق، منگل کو کمپنی نے مائیکروسافٹ ایجنٹ 365 کا اعلان کیا، جو صارفین کو 2028 تک خودکار طور پر دفتری کام کرنے والے تقریباً 1.3 ارب اے آئی ایجنٹس کی نگرانی کی سہولت فراہم کرے گا۔
ایجنٹس ایسے مصنوعی ذہانت والے پروگرام ہیں جو انسانوں کی جانب سے مختلف کام انجام دیتے ہیں، اور مائیکروسافٹ سمیت دیگر کمپنیاں اس طرح کے ایجنٹ سافٹ ویئر کو تیزی سے مارکیٹ کر رہی ہیں۔
کچھ صارفین نے کوڈ جنریشن جیسے کاموں کے لیے ان سسٹمز کو کامیابی سے استعمال کیا ہے، جبکہ دیگر صارفین کو انہیں نافذ کرنے میں مشکلات کا سامنا رہا، جس سے اس شعبے میں ممکنہ چیلنجز سامنے آئے ہیں۔
مائیکروسافٹ کے مطابق، جس طرح آئی ٹی ٹیم یہ دیکھ سکتی ہے کہ کون کمپنی کے نیٹ ورک پر موجود ہے اور کن وسائل تک رسائی رکھتا ہے، اسی طرح نیا سافٹ ویئر اے آئی ایجنٹس کی نگرانی اور ان پر کنٹرول فراہم کرے گا۔
مائیکروسافٹ کا کہنا ہے کہ یہ پروگرام آئی ٹی اہلکاروں کو ’باغی‘ ایجنٹس کو الگ (قرنطینہ) کرنے اور مجاز ایجنٹس کو مختلف پیداواریت کے ٹولز فراہم کرنے کی سہولت دیتا ہے۔