ملک میں ہفتہ وار مہنگائی کی شرح میں اضافہ

ملک میں ہفتہ وار مہنگائی میں 0.07 فیصد اضافہ ریکارڈ کیا گیا، جس کے ساتھ مہنگائی کی مجموعی سالانہ شرح 3.53 فیصد ہو گئی۔ وفاقی ادارہ شماریات نے مہنگائی سے متعلق ہفتہ وار رپورٹ جاری کی ہے، جس کے مطابق حالیہ ہفتے میں 16 اشیائے ضروریہ کی قیمتیں بڑھیں، 13 اشیاء سستی ہوئیں اور 22 کی قیمتیں مستحکم رہیں۔

رپورٹ کے مطابق ٹماٹر کی قیمت میں 57.03 فیصد، لہسن میں 2.61 فیصد اور چینی میں 2.23 فیصد اضافہ ہوا۔

اس کے علاوہ کیلے 0.72 فیصد اور چائے 0.59 فیصد مہنگی ہو گئی۔ ڈیزل، بیف، کھانے کا تیل، ایل پی جی اور جلانے والی لکڑی کی قیمتیں بھی بڑھیں۔

دوسری جانب پیاز کی قیمت میں 12.38 فیصد اور چکن کی قیمت میں 8.07 فیصد کمی دیکھی گئی۔ آلو، آٹا، انڈے، دال مونگ اور دال چنا بھی سستی ہوئی۔