عالمی مالیاتی ادارے نے پاکستان میں نیشنل ٹیرف پالیسی 30-2025 پر عملدرآمد کو یقینی بنانے کی ہدایت دی ہے۔ آئی ایم ایف نے کہا ہے کہ ٹیرف نظام کو سادہ بنانے کے لیے اصلاحات کا عمل جاری رکھا جائے اور نیشنل ٹیرف کمیشن کا بیرونی مشیروں پر انحصار کم کیا جائے۔ ادارے نے زور دیا کہ کمیشن پر لابنگ گروپوں کے اثرورسوخ کو محدود کرنا ضروری ہے۔
آئی ایم ایف نے مزید کہا کہ نیشنل ٹیرف کمیشن کی تکنیکی صلاحیت کو مضبوط بنایا جائے، ادارے کی ساکھ کو بہتر بنایا جائے، رینٹ اسکیمنگ کے رجحانات کو کم کیا جائے اور شفافیت میں اضافہ کیا جائے تاکہ معاشی پالیسیوں میں اعتماد بڑھایا جا سکے۔
آئی ایم ایف کے مطابق کسٹم کے نفاذ کا کمزور نظام ٹیرف اصلاحات کے اثرات کو کمزور کررہا ہے، کسٹم میں خامیاں دورکی جائیں، سیکشن 18اے ففتھ شیڈول ختم کیا جائے، کسٹمز ایکٹ کے سیکشن 19کے تحت چھوٹ کے استعمال کو محدود کیاجائے جب کہ ٹیرف اسٹرکچر یقینی بنانے کےلیے صوابدیدی ٹیکس چھوٹ کو بھی کم کیا جائے۔