سردیوں میں فون کی بیٹری جلد ختم کیوں ہوجاتی ہے؟ وجہ سامنے آگئی

کیا آپ نے کبھی محسوس کیا ہے کہ سرد موسم میں آپ کے اسمارٹ فون کی بیٹری معمول سے کہیں جلد ختم ہو جاتی ہے؟

یہ مسئلہ صرف آپ کے ساتھ نہیں بلکہ بہت سے صارفین کے لیے عام ہے، کیونکہ فون کی بیٹریز واقعی سردی کے اثرات سے متاثر ہوتی ہیں۔

لیکن یہ کیوں ہوتا ہے؟

یہ بالکل ویسے ہی ہے جیسے الیکٹرک گاڑیوں کی بیٹریز سردیوں میں کم کارکردگی دکھاتی ہیں۔

اس کی وجہ فون میں استعمال ہونے والی بیٹریز کے کیمیکل ردعمل ہیں۔

زیادہ تر اسمارٹ فونز میں لیتھیم آئیون بیٹریز استعمال ہوتی ہیں، جن میں الیکٹرولائٹ نامی سیال موجود ہوتا ہے۔ یہ سیال چارج ذرات کو منتقل کرنے میں مدد دیتا ہے، جس سے برقی توانائی پیدا ہوتی ہے۔

سرد موسم یا کم درجہ حرارت میں یہ عمل سست ہو جاتا ہے، جس کی وجہ سے بیٹری جلد ختم ہونے لگتی ہے۔

لیتھیم آئیونز سرد موسم میں سست ہو جاتے ہیں اور الیکٹروڈز سے درست طور پر رابطہ نہیں کرپاتے جبکہ بیٹری اتنا کرنٹ پیدا نہیں کرپاتی، جس کے باعث فون کی بیٹری بہت تیزی سے ختم ہوتی ہے۔

ماہرین کے مطابق فون بیٹری 18 سینٹی گریڈ سے 26 ڈگری سینٹی گریڈ درجہ حرارت بہترین ہوتا ہے جبکہ مثالی چارجنگ درجہ حرارت ایک سے 45 ڈگری سینٹی گریڈ ہوتا ہے۔

اس سے باہر کوئی بھی درجہ حرارت بیٹری چارجنگ کے لیے بہترین نہیں سمجھا جاتا جبکہ نقطہ انجماد سے نیچے کا درجہ حرارت بیٹری کو نقصان پہنچا سکتا ہے۔