حکومت نے استعمال شدہ گاڑیوں کی درآمد سے متعلق پالیسی میں بڑی تبدیلیوں پر غور شروع کر دیا ہے۔ مجوزہ اصلاحات کے تحت پرسنل بیگیج اسکیم ختم کرنے جبکہ گفٹ اسکیم اور ٹرانسفر آف ریزیڈنس اسکیم کو زیادہ سخت بنانے کی سفارش کی گئی ہے۔ وزارتِ تجارت نے اس سلسلے میں ایک سمری تیار کرکے کابینہ کی اقتصادی رابطہ کمیٹی کو بھجوا دی ہے، جس میں پرسنل بیگیج اسکیم کو مکمل طور پر ختم کرنے کی تجویز دی گئی ہے۔
سمری کے مطابق گفٹ اور ٹرانسفر آف ریزیڈنس اسکیم کے موجودہ قواعد میں سختی لائی جائے گی تاکہ ان کا غلط استعمال روکا جا سکے۔
اعلیٰ حکومتی ذرائع کے مطابق مختلف تجاویز زیرِ غور ہیں، جن پر حتمی فیصلہ اقتصادی رابطہ کمیٹی کرے گی۔ مجوزہ تبدیلیوں کا مقصد استعمال شدہ گاڑیوں کی درآمد کے نظام کو شفاف اور بدعنوانی سے پاک بنانا ہے۔