چین کی الیکٹرک گاڑیاں تیار کرنے والی کمپنی بی وائے ڈی (BYD) نے سال 2025 کے دوران فروخت کے لحاظ سے ایلون مسک کی امریکی کمپنی ٹیسلا کو پیچھے چھوڑ دیا ہے۔
رپورٹس کے مطابق بی وائے ڈی نے 2025 میں 22 لاکھ 50 ہزار سے زائد الیکٹرک گاڑیاں فروخت کیں، جبکہ ٹیسلا گزشتہ سال تقریباً 16 لاکھ بیٹری سے چلنے والی گاڑیاں فروخت کرنے میں کامیاب ہو سکی۔
ماہرین کے مطابق ٹیسلا کو ایک جانب ایلون مسک کی سیاسی سرگرمیوں کے باعث تنقید اور دباؤ کا سامنا رہا، جبکہ دوسری جانب چینی کمپنی بی وائے ڈی کی جانب سے سخت مسابقت نے بھی ٹیسلا کی فروخت کو متاثر کیا۔
بی وائے ڈی اس وقت دنیا کی بڑی الیکٹرک وہیکل کمپنیوں میں شمار ہوتی ہے جو الیکٹرک گاڑیوں کے ساتھ ساتھ جدید بیٹری ٹیکنالوجی، الیکٹرک بسیں اور توانائی کے متبادل حل بھی تیار کرتی ہے۔
کم قیمت گاڑیوں، جدید بیٹری سسٹمز اور مضبوط پیداواری صلاحیت کے باعث بی وائے ڈی عالمی مارکیٹ میں تیزی سے اپنی جگہ مضبوط بنا رہی ہے، جس کے نتیجے میں ٹیسلا سمیت دیگر عالمی آٹو کمپنیاں سخت مقابلے کا سامنا کر رہی ہیں۔