مقبول سوشل میڈیا پلیٹ فارم ٹک ٹاک نے سوشل میڈیا سے ہٹ کر مختصر تفریحی مواد کے میدان میں قدم رکھتے ہوئے ایک نئی مائیکرو ڈراما ایپ ’’پائن ڈراما‘‘ خاموشی سے ریلیز کر دی۔
غیر ملکی خبر رساں ایجنسی کے مطابق پائن ڈراما میں ایک منٹ کی اقساط پر مشتمل مختصر ڈرامے پیش کیے جاتے ہیں۔ جہاں ہر ویڈیو ایک اسکرپٹڈ کہانی کا حصہ ہوتی ہے۔ یہ مائیکرو ڈرامے تیز رفتار انداز اور لگاتار دیکھنے کے تجربے کو مدنظر رکھتے ہوئے ڈیزائن کیے گئے ہیں۔
فی الحال یہ ایپ صارفین کے لیے مکمل طور پر مفت اور بغیر اشتہارات کے دستیاب ہے۔ تاہم مستقبل میں اس میں مونیٹائزیشن کے فیچرز متعارف کرائے جانے کا امکان ہے۔
ایپ میں موجود ڈسکور ٹیب کے ذریعے صارفین ’’آل‘‘ اور ’’ٹرینڈنگ‘‘ ڈراموں تک رسائی حاصل کر سکتے ہیں۔ جبکہ عمودی اسکرولنگ کے ذریعے اپنی دلچسپی کے مطابق اقساط مسلسل دیکھی جا سکتی ہیں۔
پائن ڈراما پر دستیاب اصناف میں رومانس، تھرلر اور فیملی ڈرامے شامل ہیں۔ مقبول عنوانات میں ’’لوو ایٹ فرسٹ بائٹ‘‘ اور ’’دی آفیسر فیلڈ فار می‘‘ خاص توجہ حاصل کر رہے ہیں۔
صارفین کے لیے ایپ میں فیورٹس، واچ ہسٹری اور کمنٹ سیکشن جیسے فیچرز بھی شامل کیے گئے ہیں۔ جن کے ذریعے وہ اپنی پسندیدہ سیریز کو ٹریک کر سکتے ہیں اور دیگر ناظرین کے ساتھ تبادلہ خیال بھی کر سکتے ہیں۔
فل اسکرین ویو کے دوران کیپشن اور سائیڈ بار ہٹا دیئے جاتے ہیں۔ تاکہ دیکھنے کا تجربہ مزید واضح اور پرکشش ہو جائے۔
پائن ڈراما کے ذریعے ٹک ٹاک براہ راست ریل شارٹ اور ڈراما باکس جیسے پلیٹ فارمز کو مقابلہ دے رہا ہے۔ جو کم بجٹ اور کلیف ہینگر طرز کی کہانیوں کی بدولت تیزی سے مقبول ہوئے ہیں۔
ویرائٹی کے مطابق مائیکرو ڈراما مارکیٹ کے بارے میں اندازہ ہے کہ 2030 تک اس کا سالانہ ریونیو 26 بلین ڈالر تک پہنچ سکتا ہے۔ جس سے یہ شعبہ ٹیکنالوجی انڈسٹری کے بڑے کھلاڑیوں کے لیے غیر معمولی اہمیت اختیار کر گیا ہے۔
ٹک ٹاک کی نئی ایپ ’’پائن ڈراما‘‘ اس وقت آئی او ایس اور اینڈرائیڈ دونوں پلیٹ فارمز پر دستیاب ہے۔