انسٹا گرام کی جانب سے ایک نئے فیچر پر کام کیا جا رہا ہے جس سے صارفین خود کو کسی اور فرد کی کلوز فرینڈز لسٹ سے خارج کرسکیں گے۔
میٹا کی جانب سے اس فیچر کی تیاری کی تصدیق کرتے ہوئے بتایا گیا کہ اس پر کام ابتدائی مراحل سے گزر رہا ہے اور صارفین میں اس کی آزمائش شروع نہیں کی گئی۔
انسٹا گرام کے کلوز فرینڈز فیچرز سے صارفین اسٹوریز، ریلز اور پوسٹس کو صرف منتخب کردہ مخصوص افراد سے شیئر کرسکتے ہیں۔
اس فیچر کو 2018 میں متعارف کرایا گیا تھا مگر صارفین تاحال خود کو کسی اور فرد کی کلوز فرینڈز لسٹ سے نکال نہیں سکتے۔
اس فیچر کو سب سے پہلے ایک ایکس (ٹوئٹر) صارف الیسنڈرو پلوزی نے رپورٹ کیا تھا جو کہ میٹا ایپس کے نئے فیچرز کو تلاش کرنے کے حوالے سے جانے جاتے ہیں۔
ان کی جانب سے شیئر کیے گئے اسکرین شاٹ سے عندیہ ملا کہ نئے فیچر میں کلوز فرینڈز سے نکلنے پر میٹا کی جانب سے صارفین کو انتباہ کرتے ہوئے بتایا جائے گا کہ وہ اپنے دوست کے کلوز فرینڈز سے شیئر کیے گئے مواد کو اس وقت تک نہیں دیکھ سکیں گے جب تک انہیں دوبارہ فہرست میں ایڈ نہیں کرلیا جاتا۔
اگرچہ کچھ افراد اس کو اچھا نہیں سمجھیں گے کہ کوئی فرد ان کی تیار کردہ کلوز فرینڈز لسٹ سے باہر نکل جائے مگر ان صارفین کے لیے یہ بہترین فیچر ہوگا جو مخصوص افراد کی لسٹس کا حصہ بننا نہیں چاہتے۔
اس طرح کا فیچر اسنیپ چیٹ میں پہلے سے موجود ہے اور اب میٹا کی جانب سے اسے انسٹا گرام کا حصہ بنانے پر غور کیا جا رہا ہے۔
جیسا اوپر درج کیا جاچکا ہے کہ ابھی اس فیچر پر ہونے والا کام ابتدائی مراحل میں ہے تو یہ کہنا مشکل ہے کہ یہ کب تک تمام صارفین کو دستیاب ہوگا۔