عالمی منڈی میں خام تیل کی قیمتوں میں بھی کمی دیکھنے میں آئی ہے، برینٹ کروڈ آئل کی قیمت کم ہو کر 68 ڈالر 79 سینٹ فی بیرل پر آ گئی، جبکہ امریکی ڈبلیو ٹی آئی کروڈ آئل بھی سستا ہو کر 64 ڈالر 13 سینٹ فی بیرل کے حساب سے دستیاب ہے۔
تیل کی عالمی مارکیٹ میں اتار چڑھاؤ کے درمیان بھارتی کمپنی انڈین آئل کارپوریشن نے روس سے تیل کی خریداری روک دی ہے،ذرائع کے مطابق کمپنی نے روسی تیل کے متبادل کے طور پر مغربی افریقہ اور مشرق وسطیٰ سے مجموعی طور پر 60 لاکھ بیرل خام تیل خرید لیا ہے۔
ادھر یورپی یونین نے بھی روسی تیل پر عائد پابندیوں کو مزید سخت کر دیا ہے، جس کے باعث عالمی توانائی مارکیٹ پر اثرات مرتب ہونے کا امکان ظاہر کیا جا رہا ہے، ماہرین کے مطابق آنے والے دنوں میں عالمی سیاسی اور معاشی صورتحال کے تناظر میں تیل اور قیمتی دھاتوں کی قیمتوں میں مزید اتار چڑھاؤ دیکھا جا سکتا ہے۔
دوسری جانب بین الاقوامی منڈی میں قیمتی دھاتوں اور خام تیل کی قیمتوں میں نمایاں کمی ریکارڈ کی گئی، عالمی مارکیٹ میں سونے کی قیمت میں ایک فیصد کمی کے بعد فی اونس قیمت 5 ہزار 16 ڈالر پر آ گئی، جبکہ چاندی کی قیمت میں 2.5 فیصد کمی دیکھی گئی، جس کے بعد چاندی فی اونس 81 ڈالر 31 سینٹ پر دستیاب ہے۔
مارکیٹ ذرائع کے مطابق 29 جنوری کو عالمی منڈی میں سونے کی قیمت 5 ہزار 594 ڈالر فی اونس تک پہنچ گئی تھی، جبکہ اسی روز چاندی کی قیمت 121 ڈالر فی اونس ریکارڈ کی گئی تھی، تاہم حالیہ دنوں میں سرمایہ کاروں کے محتاط رویے اور عالمی معاشی عوامل کے باعث قیمتی دھاتوں کی قیمتوں میں دباؤ دیکھا جا رہا ہے۔
پلاٹینم کی قیمت میں بھی 1.6 فیصد کمی ریکارڈ کی گئی، جس کے بعد پلاٹینم فی اونس 2 ہزار 88 ڈالر پر آ گیا ہے، جبکہ پلاڈیم کی قیمت بھی کم ہو کر ایک ہزار 710 ڈالر فی اونس رہ گئی ہے۔