پاکستان کے قومی خلائی ادارے SUPARCO نے اسپیس ٹیکنالوجی کے میدان میں اہم سنگِ میل عبور کرتے ہوئے مقامی سطح پر تیار کردہ الیکٹرو آپٹیکل-2 (ای او-2) سیٹلائٹ کو کامیابی سے خلا میں لانچ کر دیا ہے۔
یہ سیٹلائٹ چین کے Yangjiang Sea Launch Center سے خلا میں بھیجا گیا۔ سپارکو کے ترجمان کے مطابق ای او-2 سیٹلائٹ پاکستان کی زمین کے مشاہدے اور امیجنگ کی صلاحیت میں نمایاں اضافہ کرے گا۔
ترجمان کا کہنا ہے کہ یہ سیٹلائٹ ملکی منصوبہ بندی، قدرتی وسائل کے انتظام اور اسٹریٹجک فیصلہ سازی کے لیے اہم ڈیٹا فراہم کرے گا۔ اس کے ذریعے مشاہداتی نظام میں تسلسل اور درستگی بہتر ہوگی، جس سے زرعی، ماحولیاتی اور شہری منصوبہ بندی کے شعبوں کو فائدہ پہنچے گا۔
سپارکو کے مطابق ای او-2 سیٹلائٹ کی کامیاب لانچ پاکستان کی خلائی مہارت اور سیٹلائٹ ٹیکنالوجی میں خود انحصاری کی علامت ہے۔ یہ سیٹلائٹ قدرتی آفات کے انتظام، ڈیزاسٹر رسپانس اور قومی سلامتی سے متعلق امور میں بھی معاون ثابت ہوگا۔
واضح رہے کہ اس سے قبل جنوری 2025 میں سپارکو نے ای او-1 سیٹلائٹ بھی لانچ کیا تھا، جو زراعت، شہری منصوبہ بندی، خوراک کے تحفظ اور پانی کے انتظام کے لیے ڈیزائن کیا گیا تھا۔
حکام کے مطابق ای او-2 کی شمولیت سے پاکستان کے سیٹلائٹ بیڑے میں اضافہ ہوگا اور زمین کے مشاہدے کی مجموعی صلاحیت مزید مضبوط ہو جائے گی۔
