پشاور میں آٹے کی قیمتوں میں 200 روپے اضافہ، 20 کلو تھیلا 3100 سے 3200 روپے تک پہنچ گیا، رمضان سے قبل مزید مہنگائی کا خدشہ۔
پشاور میں آٹے کی قیمتوں میں ایک بار پھر اضافہ کر دیا گیا، جس کے بعد 20 کلو کا تھیلا 3 ہزار روپے سے بھی تجاوز کر گیا ہے۔
آٹا ڈیلرز ایسوسی ایشن کے مطابق مکس آٹے کا 20 کلو تھیلا 2900 روپے سے بڑھ کر 3100 روپے میں فروخت ہو رہا ہے، جبکہ فائن آٹے کا 20 کلو تھیلا 3000 روپے سے بڑھ کر 3200 روپے تک پہنچ گیا ہے۔
شہریوں کا کہنا ہے کہ رمضان المبارک سے قبل ہی گراں فروش سرگرم ہو چکے ہیں اور من مانی قیمتیں وصول کی جا رہی ہیں، جس سے متوسط اور کم آمدنی والے طبقے کو شدید مشکلات کا سامنا ہے۔
دوسری جانب آٹا ڈیلرز ایسوسی ایشن کا مؤقف ہے کہ مارکیٹ میں ڈیمانڈ کے مطابق سپلائی موجود نہیں، جس کے باعث قیمتوں میں مسلسل اضافہ دیکھنے میں آ رہا ہے۔
ذرائع کے مطابق رمضان المبارک کے آغاز سے قبل آٹے کی قیمتوں میں مزید اضافے کا خدشہ بھی ظاہر کیا جا رہا ہے۔