نیشنل الیکٹرک پاور ریگولیٹری اتھارٹی (نیپرا) نے پرانے سولر صارفین کے لیے نیٹ میٹرنگ پالیسی برقرار رکھنے کا فیصلہ کرلیا، جس سے ہزاروں گھریلو اور کمرشل صارفین کو ریلیف مل گیا ہے۔
نیپرا کی جانب سے جاری اعلامیے کے مطابق وہ صارفین جو پہلے سے نیٹ میٹرنگ سسٹم پر رجسٹرڈ ہیں، ان پر سابقہ پالیسی ہی لاگو رہے گی۔ اتھارٹی نے سولر پالیسی 2026 میں مجوزہ ترامیم کا مسودہ بھی جاری کر دیا ہے اور متعلقہ شراکت داروں سے 30 روز کے اندر تجاویز طلب کی ہیں۔
نوٹیفکیشن کے مطابق ترامیم کا اطلاق 9 فروری 2026 سے ہوگا۔ تاہم پرانے صارفین کے حقوق اور مراعات کو برقرار رکھنے کا واضح اعلان کیا گیا ہے، جسے سولر انڈسٹری اور صارفین کی جانب سے مثبت پیش رفت قرار دیا جا رہا ہے۔
واضح رہے کہ اس سے قبل نیپرا نے سابقہ نیٹ میٹرنگ پالیسی ختم کر کے نیٹ بلنگ کے حوالے سے نوٹیفکیشن جاری کیا تھا، جس پر سولر صارفین اور ماہرین کی جانب سے تحفظات کا اظہار کیا گیا تھا۔ حالیہ فیصلے کے بعد پرانے صارفین کو ممکنہ مالی نقصان سے بچا لیا گیا ہے۔
ماہرین کے مطابق یہ اقدام قابلِ تجدید توانائی کے فروغ اور سولر سیکٹر میں سرمایہ کاری کے اعتماد کو برقرار رکھنے میں مددگار ثابت ہوگا۔