دنیا بھر میں سماجی رابطے کے پلیٹ فارم X (سابقہ ٹوئٹر) کی سروسز متاثر ہونے سے صارفین کو شدید پریشانی کا سامنا کرنا پڑا۔ آن لائن سروسز کی نگرانی کرنے والی ویب سائٹ Downdetector کے مطابق پیر کے روز ہزاروں صارفین نے ’ایکس‘ کے استعمال میں مسائل کی شکایات درج کروائیں۔
رپورٹس کے مطابق امریکہ، برطانیہ اور پاکستان سمیت مختلف ممالک میں صارفین کو فیڈ لوڈ کرنے، لاگ اِن کرنے اور نوٹیفیکیشنز دیکھنے میں مشکلات پیش آئیں۔
پاکستان میں بھی شام تقریباً 6 بج کر 42 منٹ پر ’ایکس‘ کی اچانک بندش رپورٹ ہوئی، جس کے باعث متعدد صارفین سروس تک رسائی حاصل نہ کر سکے۔
سوشل میڈیا پر دیگر پلیٹ فارمز کے ذریعے صارفین نے اس بندش کی تصدیق کی۔
تاحال ’ایکس‘ انتظامیہ کی جانب سے اس عارضی بندش کی وجوہات سے متعلق کوئی باضابطہ بیان جاری نہیں کیا گیا۔
واضح رہے کہ گزشتہ ماہ بھی ’ایکس‘ کو دو مرتبہ عارضی بندش کا سامنا کرنا پڑا تھا، جس کے باعث 13 اور 16 جنوری کو دنیا بھر میں ہزاروں صارفین متاثر ہوئے تھے۔