الیکٹرک گاڑیوں کیلئے گھروں پر چارجنگ سسٹم متعارف کرا دیا گیا۔ ایف پی سی سی آئی انرجی کمیٹی کے کنوینئر ملک خدا بخش کا کہنا ہے کہ ملک میں الیکٹرک وہیکلز کی تعداد میں اضافہ ہو رہا ہے، اب تک چھہتر ہزار سے زائد الیکٹرک وہیکلز سڑکوں پر آ چکی ہیں۔
ان گاڑیوں کی بڑھتی ہوئی طلب کے پیش نظر گھروں پر چارجنگ سسٹم کی سہولت فراہم کی جا رہی ہے۔
ایف پی سی سی آئی انرجی کمیٹی کے کنونیر اور پاکستان بزنس فورم سندھ زون کے چیئرمین ملک خدا بخش کاکہناہے کہ الیکٹرک وہیکل چارجنگ سسٹم اب گھر پر بھی لگایا جاسکتا ہے۔
الیکٹرک وہیکل کے لئے عوام کی طلب گھروں پر چارج کرنے کی بڑھ رہی ہے، جس پر ہم برطانوی چارجنگ سسٹم کے پاکستان میں ڈسٹری بیوٹرز بن گئے ہیں۔
ملک خدا بخش کے مطابق حکومت کی پالیسی ہے کہ ملک بھر میں الیکٹرک وہیکل کا فروغ ہو،پالیسی کے تحت اگلے 5 برس میں 30 فیصد گاڑیاں الیکٹرک ہونگی۔
گھروں پر یہ جدید الیکٹرک چارجنگ سسٹم ڈیڑھ لاکھ سے ڈھائی لاکھ میں ملے گاجوکیش اور قسطوں دونوں میں لینے کی سہولت ہوگی۔
ملک خدا بخش کے مطابق پاکستان میں اب تک تقریباً 76 ہزار الیکٹرک وہیکلز سڑکوں پر چل رہی ہیں۔
اس میں تقریباً 50 ہزار الیکٹرک موٹر سائیکل ہیں ،مقامی طور پر الیکٹرک گاڑیوں کی تیاری پر کام بھی تیزی سے آگے بڑھ رہا ہےاورسال 2026 میں پاکستان میں اپنی الیکٹرک وہیکلز کی تیاری شروع ہوجائےگی۔