دنیا کی معروف انٹرنیٹ انفرااسٹرکچر کمپنی کلاؤڈ فلیئر کو بڑے پیمانے پر تکنیکی بندش کا سامنا کرنا پڑا، جس کے باعث عالمی سطح پر درجنوں اہم ویب سائٹس اور آن لائن سروسز مفلوج ہو گئیں۔
اچانک سروس میں تعطل کے باعث خصوصاً برطانیہ میں لاکھوں صارفین شدید متاثر ہوئے، جبکہ امریکہ اور دیگر ممالک میں بھی انٹرنیٹ سروسز میں خلل کی اطلاعات سامنے آئیں۔
کلاؤڈ فلیئر دنیا بھر کی لاکھوں ویب سائٹس کو سیکیورٹی، کارکردگی میں بہتری اور ڈیٹا روٹنگ کی سہولیات فراہم کرتا ہے۔ کمپنی کے عالمی نیٹ ورک میں خرابی کے باعث متعدد بڑی آن لائن سروسز براہِ راست متاثر ہوئیں، جن میں Microsoft، Outlook اور Uber جیسے نمایاں پلیٹ فارمز شامل ہیں۔
صارفین کی بڑی تعداد نے ویب سائٹس تک رسائی میں ناکامی، ایرر میسجز اور ای میل سروس کی عارضی بندش سے متعلق شکایات درج کروائیں۔
ماہرین کے مطابق چونکہ کلاؤڈ فلیئر عالمی سطح پر ویب ٹریفک کے ایک بڑے حصے کو ہینڈل کرتا ہے، اس لیے معمولی تکنیکی خرابی بھی وسیع پیمانے پر ڈیجیٹل نظام کو متاثر کر سکتی ہے۔
کمپنی کی جانب سے صورتحال پر قابو پانے کے لیے فوری اقدامات کیے جا رہے ہیں، جبکہ سروس کی مکمل بحالی کے لیے تکنیکی ٹیمیں مسلسل کام کر رہی ہیں