Apple Inc. نے 4 مارچ کو ایک خصوصی ایونٹ منعقد کرنے کا اعلان کیا ہے، جہاں مختلف رپورٹس کے مطابق کمپنی اپنا رواں سال کا سستا ترین نیا آئی فون متعارف کرائے گی۔
اطلاعات کے مطابق اس ایونٹ میں آئی فون 16 ای کے اپ گریڈ ورژن کو آئی فون 17 ای کے نام سے پیش کیا جا سکتا ہے۔ یہ 2026 کا کم قیمت آئی فون ہوگا جس کی ابتدائی قیمت تقریباً 599 ڈالرز متوقع ہے۔
ڈیزائن میں کیا تبدیلی ہوگی؟
ڈیزائن کے لحاظ سے آئی فون 17 ای گزشتہ ماڈل سے کافی حد تک مشابہ ہوگا، تاہم سب سے بڑی ممکنہ تبدیلی فرنٹ کیمرے کے حوالے سے ہوگی۔
آئی فون 16 ای میں نوچ ڈیزائن استعمال کیا گیا تھا، جبکہ لیکس کے مطابق نئے ماڈل میں سیلفی کیمرے کے لیے ڈائنامک آئی لینڈ (پل ڈیزائن) متعارف کرایا جا سکتا ہے، جو جدید آئی فونز کی پہچان بن چکا ہے۔
کارکردگی میں بہتری
رپورٹس کے مطابق آئی فون 17 ای میں نیا اے 19 پراسیسر دیا جائے گا، جو پرفارمنس کے لحاظ سے مرکزی آئی فون 17 سیریز کے برابر ہوگا۔ اس سے صارفین کو تیز رفتار اور بہتر ملٹی ٹاسکنگ کا تجربہ ملنے کی توقع ہے۔
میگ سیف اور دیگر اپ گریڈز
ایک اہم اپ گریڈ میگ سیف سپورٹ کا اضافہ ہوگا۔ آئی فون 16 ای میں صرف سادہ وائرلیس چارجنگ موجود تھی، جبکہ نئے ماڈل میں تیز رفتار میگنیٹک چارجنگ سپورٹ متوقع ہے۔
مزید یہ کہ ڈیوائس میں ایپل کا نیا سی 1 ایکش موڈیم شامل کیے جانے کا امکان ہے، جو بہتر ڈیٹا اسپیڈ اور توانائی کی بچت فراہم کرے گا۔
وائی فائی اور بلیو ٹوتھ کنیکٹیویٹی کے لیے نئی این 1 وائرلیس چپ بھی متعارف کرائی جا سکتی ہے۔
ایپل کی جانب سے ابھی تک باضابطہ طور پر ڈیوائس کی تفصیلات جاری نہیں کی گئیں، تاہم 4 مارچ کا ایونٹ اس حوالے سے اہم پیش رفت ثابت ہو سکتا ہے۔