2022 میں Apple نے آئی فون صارفین کے لیے پہلی بار سیٹلائیٹ کے ذریعے ایمرجنسی ایس او ایس پیغامات بھیجنے کا فیچر متعارف کرایا تھا، جس کا مقصد ہنگامی حالات میں انسانی جانیں بچانا ہے۔ اب اسی فیچر نے ایک بار پھر 6 افراد کی جان بچانے میں اہم کردار ادا کیا ہے۔
امریکا کی جھیل تاہو کے قریب اسکائینگ کے دوران 6 افراد برفانی تودے (ایوا لانچ) میں پھنس گئے۔ علاقے میں نہ سیلولر سگنل موجود تھا اور نہ ہی وائی فائی دستیاب تھی۔ ایسے میں متاثرہ افراد نے آئی فون 14، 15، 16 اور 17 سیریز میں موجود ایمرجنسی ایس او ایس فیچر استعمال کیا۔
یہ فیچر فعال کرنے پر فون کو سیٹلائیٹ سے جوڑ دیتا ہے، جس کے ذریعے ایمرجنسی سروسز کو پیغام اور لوکیشن بھیجی جاتی ہے۔ پھنسے ہوئے افراد نے اسی سہولت کے ذریعے نیواڈا کاؤنٹی شیرف آفس کو مدد کا پیغام بھیجا۔
کیلیفورنیا آفس آف ایمرجنسی سروسز کے حکام کے مطابق ریسکیو ٹیم کا ایک اہلکار تقریباً چار گھنٹے تک شیرف آفس کے ساتھ رابطے میں رہا، جس کے بعد امدادی کارروائی مکمل کی گئی اور تمام 6 افراد کو بحفاظت نکال لیا گیا۔
واضح رہے کہ ایمرجنسی ایس او ایس سیٹلائیٹ فیچر کے ذریعے امریکا اور کینیڈا میں متعدد جانیں بچائی جا چکی ہیں۔ یہ ٹیکنالوجی ایسے علاقوں میں خاص طور پر مؤثر ثابت ہوئی ہے جہاں موبائل نیٹ ورک دستیاب نہیں ہوتا۔