واٹس ایپ میں اسٹیٹس اپ ڈیٹس کے حوالے سے ایک نیا فیچر متعارف کرایا گیا ہے۔
wabetainfo کی رپورت کے مطابق واٹس ایپ نے محدود خطوں میں ایک نیا فیچر متعارف کرایا ہے۔
اس فیچر سے صارفین ایسے افراد سے اسٹیٹس شیئر کرسکیں گے جو ان کے کانٹیکٹس میں تو شامل نہیں ہوں گے مگر ان سے چیٹ کرچکے ہوں گے۔
یعنی ایسے افراد جن کو حال ہی میں میسج کیا ہو یا کال کی ہو اور نمبر کو کانٹیکٹس میں محفوظ نہ کیا ہو۔
رپورٹ میں بتایا گیا کہ کچھ عرصے قبل اینڈرائیڈ ڈیوائسز کے لیے واٹس ایپ کے بیٹا (beta) ورژن میں اسٹیٹس اپ ڈیٹس کے حوالے سے کلوز فرینڈز کا فیچر سامنے آیا تھا۔
اس فیچر کے ذریعے صارفین مخصوص افراد تک ہی اسٹیٹس شیئر کرسکیں گے۔
اس فیچر پر ابھی کام جاری ہے مگر اس کے ساتھ ساتھ واٹس ایپ نے اسٹیٹس اپ ڈیٹس کو زیادہ افراد تک پہنچانے کی سہولت بھی فراہم کر دی ہے۔
ابھی تک اسٹیٹس صرف وہی افراد دیکھ سکتے ہیں جو کسی صارف کی کانٹیکٹ لسٹ میں ہوتے ہیں مگر پرائیویسی سیٹنگز میں نئی تبدیلیاں کی جا رہی ہیں۔
رپورٹ کے مطابق نئے فیچر سے آپ اسٹیٹس کو ایسے افراد سے بھی شیئر کرسکیں گے جو کانٹیکٹس میں شامل نہیں ہوتے، مگر ان سے ماضی میں بات چیت ہوچکی ہوتی ہے۔
رپورٹ میں مزید بتایا گیا کہ اینڈرائیڈ، آئی او ایس اور ویب ورژن میں اس فیچر کی آزمائش محدود خطوں میں کی جا رہی ہے۔
البتہ ابھی یہ واضح نہیں کہ اسے کب تک تمام صارفین کے لیے متعارف کرایا جائے گا۔