پاکستان اسٹاک ایکسچینج میں زبردست تیزی دیکھنے میں آئی ہے جس کے بعد ہنڈرڈ انڈیکس دوبارہ ایک لاکھ 56 ہزار پوائنٹس کی سطح پر بحال ہو گیا۔
کاروباری ہفتے کے دوسرے روز مارکیٹ کھلتے ہی انڈیکس میں 4 ہزار سے زائد پوائنٹس کا نمایاں اضافہ ہوا، جس سے انڈیکس 1 لاکھ 56 ہزار 106 پوائنٹس تک پہنچ گیا۔
واضح رہے کہ گزشتہ کاروباری روز مارکیٹ شدید مندی کا شکار رہی تھی اور انڈیکس 16 ہزار سے زائد پوائنٹس گر کر 1 لاکھ 51 ہزار 972 پوائنٹس پر بند ہوا تھا۔
ڈالر کی قیمت میں کمی
دوسری جانب انٹر بینک مارکیٹ میں امریکی ڈالر کی قدر میں معمولی کمی ریکارڈ کی گئی۔ ایکسچینج کمپنیز ایسوسی ایشن کے مطابق انٹر بینک میں ڈالر ایک پیسہ سستا ہو کر 279 روپے 45 پیسے پر ٹریڈ ہو رہا ہے۔
ماہرین کے مطابق مارکیٹ میں تیزی سرمایہ کاروں کے اعتماد کی بحالی کی علامت ہے، تاہم آئندہ دنوں میں عالمی اور مقامی معاشی صورتحال مارکیٹ کی سمت کا تعین کرے گی۔