ماہرین نے خبردار کیا ہے کہ اگر آبنائے ہرمز بند ہوئی تو عالمی منڈی میں خام تیل کی قیمت 150 ڈالر فی بیرل تک پہنچ سکتی ہے۔ توانائی کے شعبے کے ماہر ایڈ ہرس نے الجزیزہ سے گفتگو کرتے ہوئے کہا کہ امریکا اور اسرائیل کی ایران کے خلاف ممکنہ فوجی کارروائیوں کے باعث اگر تیل کی سپلائی میں رکاوٹ برقرار رہی تو عالمی سطح پر ایندھن کی قیمتوں میں مزید اضافہ ہو سکتا ہے۔
ان کا کہنا تھا کہ اگر آبنائے ہرمز سے گزرنے والے تیل کی ترسیل کا نصف حصہ بھی متاثر ہو جاتا ہے تو کچھ عرصے کیلئے عالمی منڈی میں تیل کی قیمتیں تیزی سے بڑھ سکتی ہیں۔
مائع قدرتی گیس (ایل این جی) کی منڈی میں اس کے اثرات پہلے ہی نظر آنا شروع ہو گئے ہیں، جہاں قیمتیں پہلے ہی دن 40 فیصد سے زیادہ بڑھ گئیں، جبکہ یورپی ممالک میں قدرتی گیس کی قیمتیں تقریباً دوگنی ہو چکی ہیں۔
ایڈ ہرس کے مطابق گیس پر انحصار کرنے والے بعض ممالک اب متبادل کے طور پر پٹرولیم مصنوعات کی زیادہ خریداری کر رہے ہیں، جس کے باعث مستقبل کے آرڈرز اور سپلائی چین بھی متاثر ہو رہی ہے۔
ان کا کہنا تھا کہ اس صورتحال کے اثرات امریکا پر بھی گہرے ہو سکتے ہیں اور اس کے اندرونِ ملک سیاسی مضمرات بھی سامنے آ سکتے ہیں، جو آئندہ وسط مدتی انتخابات کے تناظر میں صدر ڈونلڈ ٹرمپ کیلئے مشکلات پیدا کر سکتے ہیں۔