سات ممالک روسی اور بیلاروسی ایتھلیٹس کے اپنے قومی پرچم تلے مقابلہ کرنے پر احتجاجاً 2026 کے سرمائی پیرا اولمپکس کی افتتاحی تقریب کا بائیکاٹ کریں گے۔
انٹرنیشنل پیرا اولمپک کمیٹی کے مطابق جمہوریہ چیک، ایسٹونیا، فن لینڈ، لٹویا، لتھوانیا، پولینڈ اور یوکرین جمعے کی رات ویرونا میں ہونے والی تقریب میں کھلاڑیوں یا آفیشلز کو نہیں بھیجیں گے۔
برطانوی حکومت نے بھی تصدیق کی ہے کہ وہ اس تقریب میں نمائندے نہیں بھیجے گی۔ دی گارڈین کی خبر کے مطابق، حکام نے روس کے اپنے پرچم تلے مقابلہ کرنے کی مخالفت کا اعادہ کیا۔
"ہم واضح کر چکے ہیں کہ روسی اور بیلاروسی ریاستوں کو بین الاقوامی کھیلوں میں نمائندگی نہیں دی جانی چاہیے جب کہ یوکرین پر وحشیانہ حملے جاری ہیں۔”
تاہم، یوکے نے کہا کہ اس کی وزیر کھیل سٹیفنی میور اب بھی ٹیم جی بی ایتھلیٹس کی حمایت کے لیے کورٹینا میں ہونے والے پروگراموں میں شرکت کریں گی۔
انٹرنیشنل پیرا اولمپک کمیٹی کے صدر اینڈریو پارسنز نے روسی ایتھلیٹس کو اپنے قومی پرچم کے نیچے مقابلہ کرنے کی اجازت دینے کے فیصلے کا دفاع کیا۔
پارسنز نے کہا، "ہماری واضح توجہ تمام اسٹیک ہولڈرز کی آمد اور بہترین پیرا اولمپک سرمائی کھیل پیش کرنے کی تیاری پر مرکوز ہے۔
انہوں نے مزید کہا کہ یہ فیصلہ آئی پی سی کے ووٹنگ کے عمل کے ذریعے کیا گیا تھا: "میں تسلیم کرتا ہوں کہ اس فیصلے کو دنیا کے کچھ حصوں میں پذیرائی نہیں ملی ہے۔”
2026 کے سرمائی پیرالمپکس سرمائی کھیلوں کی 50 ویں سالگرہ کے موقع پر ہوں گے، جس میں 56 ممالک کے تقریباً 612 ایتھلیٹس میلان اور کورٹینا کے مختلف مقامات پر مقابلہ کریں گے۔