امریکی ٹیکنالوجی کمپنی اوپن اے آئی نے اپنا جدید مصنوعی ذہانت ماڈل چیٹ جی پی ٹی 5.4 متعارف کرا دیا ہے، جس کے بارے میں کمپنی کا دعویٰ ہے کہ یہ پچھلے تمام ماڈلز کے مقابلے میں بہتر کارکردگی فراہم کرتا ہے۔
کمپنی کے مطابق یہ نیا اے آئی ماڈل خاص طور پر پیچیدہ اور پیشہ ورانہ کاموں کے لیے تیار کیا گیا ہے اور مختلف سافٹ ویئرز کے ساتھ مؤثر انداز میں کام کر سکتا ہے۔
کمپیوٹر کو براہِ راست کنٹرول کرنے کی صلاحیت
اوپن اے آئی کے مطابق چیٹ جی پی ٹی 5.4 کو اس طرح ڈیزائن کیا گیا ہے کہ یہ کوڈ لکھ سکتا ہے اور کمپیوٹر اور سافٹ ویئر کو کنٹرول کر سکتا ہے۔اسکرین شاٹس کو سمجھ کر ماؤس اور کی بورڈ کے احکامات دے سکتا ہے۔
یہ ماڈل ویب براؤزر، ٹولز اور مختلف اے پی آئیز کے ساتھ بھی بہتر طریقے سے کام کرنے کی صلاحیت رکھتا ہے۔
پرو ورژن بھی متعارف
کمپنی نے اس کے ساتھ چیٹ جی پی ٹی 5.4 پرو بھی متعارف کرایا ہے، جو خاص طور پر پیچیدہ اور پیشہ ورانہ کاموں کے لیے بنایا گیا ہے۔
نئے ماڈل کی مدد سے صارفین سپریڈشیٹس، پریزنٹیشنز اور دستاویزات میں زیادہ مؤثر انداز میں کام مکمل کر سکیں گے۔
بہتر ویب سرچ اور معلوماتی صلاحیت
نئے ماڈل میں ویب سرچ اور بڑے ڈیٹا سیاق و سباق کو سمجھنے کی بہتر صلاحیت شامل کی گئی ہے، جس سے یہ زیادہ درست اور جامع معلومات فراہم کر سکتا ہے۔
کارکردگی میں نمایاں بہتری
اوپن اے آئی کے مطابق چیٹ جی پی ٹی 5.4 نے پچھلے ماڈلز کے مقابلے میں نمایاں بہتری دکھائی ہے اور 83 فیصد کیسز میں صنعتی پیشہ ور افراد کے برابر یا بہتر کارکردگی کا مظاہرہ کیا ہے۔
کوڈنگ ٹیسٹ میں بھی اس ماڈل نے اپنے سابقہ ورژن سے بہتر اسکور حاصل کیا۔
غلط معلومات کے امکانات کم
کمپنی کا کہنا ہے کہ یہ نیا ماڈل زیادہ درست معلومات فراہم کرنے کی صلاحیت رکھتا ہے اور اس میں غلط معلومات دینے کا امکان پچھلے ماڈلز کے مقابلے میں کم ہے۔
چیٹ جی پی ٹی 5.4 اور اس کے دیگر ورژنز اب صارفین اور ڈویلپرز کے لیے اے پی آئی کے ذریعے دستیاب ہیں، جبکہ کمپنی نے اعلان کیا ہے کہ آنے والے مہینوں میں چیٹ جی پی ٹی تھنکنگ ورژن کو ختم کر دیا جائے گا۔