وفاقی وزیر مملکت برائے پیٹرولیم علی پرویز ملک نے کہا ہے کہ اگر ایران اور اسرائیل کے درمیان جاری جنگ طویل ہو گئی تو عالمی منڈی میں تیل کی قیمتوں میں مزید اضافہ ہو سکتا ہے۔
پاکستان کی توانائی کا بڑا حصہ درآمدی
علی پرویز ملک کے مطابق پاکستان اپنی تقریباً 90 فیصد توانائی کی ضرورت درآمدی وسائل سے پوری کرتا ہے، اس لیے عالمی سطح پر کسی بھی بحران یا علاقائی تنازع کے اثرات براہِ راست پاکستان پر پڑتے ہیں۔
آبنائے ہرمز کی اہمیت
انہوں نے کہا کہ اگر آبنائے ہرمز میں کسی قسم کی رکاوٹ پیدا ہوئی تو عام حالات میں پانچ دن میں پہنچنے والا ایندھن تقریباً بیس دن میں پاکستان پہنچے گا۔
ان کے مطابق اگر سپلائی متاثر ہوئی تو اسے معمول پر آنے میں 10 سے 12 دن لگ سکتے ہیں۔
حکومت کا نیشنل ایمرجنسی جیسا رویہ
وزیر مملکت نے کہا کہ حکومت اس صورتحال کو نیشنل ایمرجنسی کے طور پر دیکھ رہی ہے اور نجی شعبے کی لیکویڈیٹی کے تحفظ کے لیے اقدامات کیے جا رہے ہیں تاکہ توانائی کی فراہمی متاثر نہ ہو۔
پیٹرول کی قیمت پر سیاست نہ کرنے کی اپیل
انہوں نے سیاسی جماعتوں اور عوام سے اپیل کی کہ موجودہ حالات میں پیٹرول کی قیمت پر سیاست نہ کی جائے اور صورتحال کی نزاکت کو سمجھا جائے۔
روسی تیل سے متعلق مسئلہ
علی پرویز ملک نے کہا کہ روسی خام تیل کو ریفائن کرنے کے لیے زیادہ فرنس آئل درکار ہوتا ہے جبکہ پاکستان کی موجودہ ریفائنریز اس حد تک اپ گریڈ نہیں کہ وہ اسے مؤثر انداز میں پراسیس کر سکیں۔
آئی ایم ایف سے بھی رابطہ
انہوں نے بتایا کہ حکومت نے آئی ایم ایف سے بھی بات کی ہے اور مطالبہ کیا ہے کہ ایندھن پر عائد لیویز ختم کی جائیں تاکہ عوام پر مالی بوجھ کم ہو سکے۔
توانائی بچانے کے اقدامات زیر غور
وزیر مملکت کے مطابق توانائی کے استعمال کو کم کرنے کے لیے طرز زندگی میں تبدیلیوں پر بھی غور کیا جا رہا ہے، جن میں ورک فرام ہوم پالیسی بھی شامل ہے۔