پاکستان اور بین الاقوامی مالیاتی فنڈ کے درمیان مذاکرات مکمل ہو گئے ہیں جس کے بعد آئی ایم ایف نے باضابطہ اعلامیہ جاری کرتے ہوئے بات چیت میں حوصلہ افزا پیشرفت کی تصدیق کی ہے۔ آئی ایم ایف کے مطابق پاکستان کے ساتھ 25 فروری سے 11 مارچ تک ہونے والے جائزہ مذاکرات میں مختلف معاشی اصلاحات اور مالیاتی امور پر تفصیلی گفتگو ہوئی۔
اعلامیے میں کہا گیا ہے کہ پاکستان نے اصلاحاتی ایجنڈے پر مثبت پیشرفت کی۔ ماحولیاتی تبدیلی سے نمٹنے کے اقدامات میں بھی بہتر کارکردگی بھی دکھائی۔
آئی ایم ایف کے مطابق پروگرام پر عملدرآمد مجموعی طور پر طے شدہ وعدوں کے مطابق رہا۔
مذاکرات کے دوران 7 ارب ڈالر کے ایکسٹینڈڈ فنڈ فیسیلٹی (EFF) پروگرام کے تحت ابھی تک اسٹاف لیول معاہدہ نہیں ہو سکا تاہم بات چیت جاری رکھنے پر اتفاق کیا گیا ہے۔
مالیاتی خسارے کو کم کرنے کے لیے پبلک فنانس کو مضبوط بنانا، توانائی کے شعبے میں اصلاحات اور سماجی تحفظ، صحت اور تعلیم کے اخراجات میں اضافہ ہو رہا ہے۔
آئی ایم ایف نے مہنگائی پر قابو پانے کے لیے سخت مانیٹری پالیسی برقرار رکھنے پر بھی زور دیا۔
مذاکرات کے دوران مشرقِ وسطیٰ میں جاری کشیدگی اور اس کے پاکستان کی معیشت پر ممکنہ اثرات پر بھی تبادلہ خیال کیا گیا۔
آئی ایم ایف کے مطابق آئندہ چند دنوں میں جاری مذاکرات کو حتمی شکل دینے کی کوشش کی جائے گی۔