دنیا کی مقبول ویڈیو شیئرنگ سروس یوٹیوب میں ایک ایسی نئی تبدیلی متعارف کرائی جا رہی ہے جو بہت سے صارفین کے لیے پریشان کن ثابت ہو سکتی ہے۔
رپورٹس کے مطابق یوٹیوب نے اسمارٹ ٹی وی ایپ میں طویل اور نان اسکیپ ایبل اشتہارات دکھانے کا سلسلہ شروع کر دیا ہے۔
کمپنی کے مطابق اب ٹی وی پر یوٹیوب دیکھنے والے صارفین کو 30 سیکنڈ تک کے اشتہارات دیکھنا پڑ سکتے ہیں۔
ان اشتہارات کو اسکیپ کرنا ممکن نہیں ہوگا یہ اشتہارات عالمی سطح پر اشتہاری کمپنیوں کے لیے دستیاب ہوں گے۔
یوٹیوب کی مالک کمپنی گوگل اس تبدیلی کے لیے مصنوعی ذہانت کا استعمال کر رہی ہے۔
اس ٹیکنالوجی کی مدد سے اشتہارات کو اس طرح ترتیب دیا جائے گا کہ وہ درست ناظرین کو مناسب وقت پر دکھائے جائیں۔
کمپنی کے مطابق اس اقدام کی ایک بڑی وجہ یہ ہے کہ لوگ ٹی وی اسکرین پر یوٹیوب زیادہ دیر تک دیکھتے ہیں۔
ٹی وی پر ویڈیوز مکمل دیکھنے کا رجحان زیادہ ہوتا ہے، اسی لیے اشتہاری کمپنیوں کو زیادہ طویل اشتہارات دکھانے کا موقع دیا جا رہا ہے۔
اگر صارفین اشتہارات کے بغیر ویڈیوز دیکھنا چاہتے ہیں تو انہیں یوٹیوب پریمیئم سبسکرپشن لینا ہوگی۔
ماہرین کے مطابق یہ تبدیلی یوٹیوب کی اشتہاری آمدنی بڑھانے کی حکمت عملی کا حصہ ہے، تاہم بہت سے ناظرین کو یہ فیصلہ پسند نہیں آئے گا۔