پیٹرول اور ڈیزل کی قیمتوں میں بڑے اضافے کی سمری حکومت کو موصول

آج پیٹرولیم مصنوعات کی قیمتوں سے متعلق حکومتی اعلان متوقع ہے۔ ذرائع کے مطابق پیٹرول کی فی لیٹر قیمت میں 29 روپے اور ڈیزل کی قیمت میں 49 روپے اضافے کی تجویز دی گئی ہے، تاہم اس حوالے سے حتمی منظوری وزیراعظم شہباز شریف دیں گے۔

یاد رہے کہ 14 مارچ کو حکومت نے عوام کو ریلیف دینے کے لیے ایک ہفتے تک قیمتیں برقرار رکھی تھیں، جس کے لیے تقریباً 23 ارب روپے کا مالی بوجھ برداشت کیا گیا۔ اس دوران پیٹرول اور ڈیزل کی قیمتوں میں بالترتیب 49 روپے 63 پیسے اور 75 روپے 5 پیسے فی لیٹر اضافے کو مؤخر کیا گیا تھا۔

ذرائع کا کہنا ہے کہ آئندہ ہفتے کے لیے بھی قیمتوں کو برقرار رکھنے پر غور کیا جا رہا ہے، اور اس مقصد کے لیے حکومت دوبارہ پرائس ڈیفرینشل کلیمز کی مد میں بوجھ اٹھا سکتی ہے۔

موجودہ صورتحال کے مطابق پیٹرول کی قیمت میں فی لیٹر 121 روپے 77 پیسے (تقریباً 38 فیصد) ٹیکس شامل ہے، جبکہ ڈیزل پر فی لیٹر 73 روپے 42 پیسے (تقریباً 22 فیصد) ٹیکس عائد ہے۔ ان میں کسٹم ڈیوٹی، پیٹرولیم لیوی اور کلائمیٹ سپورٹ لیوی شامل ہیں۔