سونے کی قیمتوں میں اضافہ، فی تولہ کتنے کا ہو گیا؟

مقامی اور عالمی مارکیٹ میں سونے کی قیمتوں میں نمایاں اضافہ ریکارڈ کیا گیا ہے، جس سے سرمایہ کاروں اور صارفین کے لیے مارکیٹ میں ہلچل مچ گئی ہے۔

آل پاکستان جیمز اینڈ جیولرز ایسوسی ایشن کا کہنا ہے کہ ملک بھر میں 24قیراط کے حامل سونے کی قیمت میں 2 ہزار 800 روپے کا اضافہ ہوا ہے جس سے فی تولہ سونے کی نئی قیمت 4 لاکھ 78 ہزار 762روپے ہوگئی۔

پاکستان جیمز اینڈ جیولرز ایسوسی ایشن کا کہنا ہے کہ 24قیراط کے حامل 10گرام سونے کی قیمت میں بھی 2 ہزار 501روپے کا اضافہ ہوا ہے جس سے 10 گرام سونے کی نئی قیمت 4لاکھ 10 ہزار 461روپے کی سطح پر آگئی۔

جیمز اینڈ جیولرز ایسوسی ایشن کے مطابق ملک بھر میں چاندی کی قیمت میں بھی اضافہ ہوا، فی تولہ چاندی کی قیمت میں 260 روپے کا اضافہ ہوا، جس سے چاندی کی نئی قیمت 7 ہزار 784روپے فی تولہ ہوگئی۔

بین الاقوامی مارکیٹ میں فی اونس سونے کی قیمت میں 28ڈالرز کا اضافہ ہوا، جس کے نتیجے میں سونے کی نئی قیمت 4 ہزار 560 ڈالرز ہوگئی۔

ماہرین کا کہنا ہے کہ عالمی سطح پر قیمتوں میں اضافہ ڈالر کے اتار چڑھاؤ اور سرمایہ کاری کی طلب میں اضافے کی وجہ سے ہوا ہے۔

سونے کی بڑھتی ہوئی قیمتوں کے باعث سرمایہ کاروں کو متحرک ہونے کی ضرورت ہے جبکہ عام صارفین کے لیے سونے کی خریداری مہنگی ہونے کا خدشہ پیدا ہو گیا ہے۔

مارکیٹ تجزیہ کاروں کا کہنا ہے کہ مستقبل قریب میں سونے کی قیمتوں میں مزید اتار چڑھاؤ متوقع ہے، اس لیے سرمایہ کاری کے فیصلے محتاط انداز میں کرنے کی ہدایت کی گئی ہے۔

واضح رہے کہ گزشتہ روز سونے کی فی تولہ سونے کی قیمت 3 ہزار 900 روپے کا اضافہ ہوا تھا۔