ایک انتہائی منفرد تحقیق سے یہ بات سامنے آئی ہے کہ اے آئی چیٹ بوٹس کا استعمال دماغی افعال کو کمزور کر کے معلومات یاد رکھنے کی صلاحیت کو متاثر کر سکتا ہے۔
یہ تحقیق برازیل کی فیڈرل یونیورسٹی آف ریو ڈی جنیرو کے اے آئی ماہر اینڈرے بارکائی نے کی جس میں 120 یونیورسٹی کے طلباء شامل تھے۔
اس تحقیق میں طلباء کو اے آئی کے بارے میں دو ہفتے سیکھنے کے لیے دیے گئے جس کے بعد انہیں اسی موضوع پر 10 منٹ کی پریزنٹیشن دینے کو کہاگیا۔ آدھے گروپ کو چیٹ جی پی ٹی استعمال کرنے کی اجازت دی گئی تاکہ وہ آن لائن معلومات تلاش کرکے انہیں جمع کریں اور ترتیب دیں ساتھ ہی مثالیں بھی فراہم کریں جبکہ دوسرے گروپ کو روایتی تحقیق کے طریقے استعمال کرنے کو کہا گیا۔تاہم اسائنمنٹ دیے جانے کے 45 دن بعد دونوں گروپ کا ٹیسٹ لیا گیا جس کے نتائج حیران کن تھے۔
ایسے تمام طلباء جنہوں نے چیٹ جی پی ٹی سے مدد لی انہوں نے 10 میں اوسطاً 5.75 نمبر حاصل کیے جبکہ وہ طلباء جنہوں نے روایتی طریقے کا استعمال کیا انہوں نے اوسطاً 6.85 نمبر حاصل کیے۔
اگرچہ شرکاء کی تعداد اور وقت کے لحاظ یہ مطالعہ نسبتاً چھوٹا تھا اس کے باوجود یہ ایک نمایاں فرق ہے۔
نتائج سے ظاہر ہوتا ہے کہ اے آئی کا استعمال معلومات تلاش کرنے میں مدد فراہم کرتا ہے تاہم یہ طویل مدتی یادداشت کو متاثر کرتا ہے اس کی وجہ یہ ہے کہ عام طریقوں یا ذرائع سے معلومات لینے کے لیےدماغ کو محنت کرنی پڑتی ہے اور یہی عمل پائیدار یادداشت کو سپورٹ کرتا ہے جبکہ چیٹ جی پی ٹی آپ کی اسی محنت کو کم کردیتا ہے۔