ایپل کی جانب سے جلد 3 آرٹی فیشل انٹیلی جنس (اے آئی) ٹیکنالوجی پر مشتمل وئیر ایبل ڈیوائسز متعارف کرائے جانے کی منصوبہ بندی کی جا رہی ہے۔
بلومبرگ رپورٹ کے مطابق ایپل کی جانب سے 3 وئیر ایبل ڈیوائسز کو تیار کیا جا رہا ہے، جنہیں وہ رواں سال کے آخر میں یا 2027 میں کسی بھی وقت متعارف کرانےکا ارادہ رکھتا ہے۔
ان ڈیوائسز میں ایک اسمارٹ گلاسز ، ایک اے آئی پن اور ایک زیادہ ایڈوانس ایئرپوڈ ہیں ۔
رپورٹ میں بتایا گیا ہے کہ ان پر تیزی سے کام کیا جار ہا ہے۔
خیال رہے کہ ایپل نے کچھ عرصے قبل گوگل سے معاہدہ کیا تھا جس کے تحت جیمنائی کو ایپل اے آئی کی بنیاد کیلئے استعمال کیا جائے گا۔
رپورٹ میں کہا گیا ہے کہ ایپل کے اے آئی گلاسز میٹا رے بین گلاسز کی طرح ڈسپلے فری ہوں گے جبکہ ان میں کیمرے، مائیکرو فونز اور اسپیکرز نصب ہونگے۔اس کے علاوہ 2 کیمروں کو ڈیوائس میں دیا جائے گا اور یہ میٹا کے رے بین گلاسز کے سائز کے ہوں گے۔
رپورٹ کے مطابق اے آئی ائیر پوڈز میں انفرا ریڈ کیمروں کو شامل کیے جانے کا امکان ہے جبکہ ڈیزائن کے لحاظ سے ائیر پوڈ پرو 3 جیسے ہوسکتے ہیں۔یہ انفرا ریڈ کیمرے تصاویر لینے کی بجائے ہاتھوں کی حرکت کو ٹریک کرکے کام کریں گے۔
رپورٹ میں بتایا گیا ہے کہ اے آئی پن میں کیمرے موجود ہوں گے اور اسے 2027 میں پیش کیے جانے کا امکان ہے۔
تاہم اس حوالے سے مزید تفصیلات نہیں بتائی گئیں ۔