رمضان سے قبل کراچی میں چینی کی نئی قیمت مقرر، ریٹیل ریٹ 141 اور ہول سیل 138 روپے فی کلو، نئی قیمتوں کا فوری اطلاق۔
کراچی میں رمضان المبارک کی آمد سے قبل چینی کی نئی سرکاری قیمت مقرر کر دی گئی ہے۔
کمشنر کراچی کے مطابق چینی کی ریٹیل قیمت 141 روپے فی کلو جبکہ ہول سیل قیمت 138 روپے فی کلو مقرر کی گئی ہے۔ نئی قیمتوں کا اطلاق فوری طور پر کر دیا گیا ہے۔
انتظامیہ کا کہنا ہے کہ اس فیصلے کا مقصد رمضان کے دوران قیمتوں کو مستحکم رکھنا اور شہریوں کو ریلیف فراہم کرنا ہے۔ حکام کے مطابق سرکاری نرخنامے پر عملدرآمد یقینی بنانے کے لیے مارکیٹوں کی نگرانی بھی کی جائے گی۔
واضح رہے کہ ملک کے مختلف شہروں میں چینی کی قیمتوں میں فرق پایا جاتا ہے، بعض علاقوں میں قیمت سرکاری نرخ کے مطابق ہے جبکہ کچھ مقامات پر چینی مہنگے داموں فروخت ہونے کی شکایات سامنے آتی رہی ہیں۔
انتظامیہ نے شہریوں سے اپیل کی ہے کہ مقررہ نرخ سے زائد قیمت وصول کرنے کی صورت میں متعلقہ حکام کو اطلاع دیں۔
