اسلام آباد (ڈیلی پاکستان آن لائن) پاکستان کرکٹ بورڈ (پی سی بی) نے فاسٹ بولر شاہین شاہ آفریدی کو قومی ون ڈے ٹیم کا نیا کپتان مقرر کر دیا۔ اس سے پہلے محمد رضوان ایک روزہ ٹیم کی قیادت کر رہے تھے ۔
نجی ٹی وی جیو نیوز کے مطابق شاہین شاہ آفریدی جنوبی افریقہ کے خلاف تین ایک روزہ میچوں کی سیریز میں ٹیم کی قیادت کریں گے۔ یہ سیریز 4 نومبر سے 8 نومبر تک فیصل آباد کے اقبال اسٹیڈیم میں کھیلی جائے گی۔
کپتان کی تقرری کا فیصلہ اسلام آباد میں منعقدہ اجلاس میں کیا گیا جس میں ہیڈ کوچ مائیک ہیسن، ڈائریکٹر ہائی پرفارمنس عاقب جاوید اور قومی سلیکشن کمیٹی کے اراکین شریک تھے۔
لیفٹ آرم فاسٹ بولر شاہین شاہ آفریدی اب تک 66 ون ڈے اور 92 ٹی ٹوئنٹی میچوں میں پاکستان کی نمائندگی کر چکے ہیں، جن میں انہوں نے 249 وکٹیں حاصل کیں۔ اس کے علاوہ وہ 32 ٹیسٹ میچوں میں بھی 120 وکٹیں لے چکے ہیں۔
شاہین شاہ آفریدی نے اس سے قبل رواں سال کے آغاز میں نیوزی لینڈ کے خلاف پانچ ٹی ٹوئنٹی میچوں کی سیریز میں بھی قومی ٹیم کی قیادت کی تھی۔
