نیشنل الیکٹرک پاور ریگولیٹری اتھارٹی (نیپرا) نے کے الیکٹرک کے صارفین کیلئے بڑا فیصلہ جاری کرتے ہوئے ٹیرف میں 7 روپے 60 پیسے فی یونٹ کمی کا حکم دے دیا۔ نیپرا نے یہ فیصلہ کے الیکٹرک کے مالی سال 2024 تا 2030 کے ملٹی ائیر ٹیرف سے متعلق نظرِثانی کی درخواستوں پر سنایا۔
فیصلے کے مطابق، کے الیکٹرک کا اوسط ٹیرف 39.97 روپے فی یونٹ سے کم کرکے 32.37 روپے فی یونٹ مقرر کیا گیا ہے۔
اتھارٹی کے مطابق، رائٹ آف کلیمز سے متعلق نیپرا کا سابقہ فیصلہ برقرار رہے گا، جبکہ نیا ٹیرف جنریشن، ٹرانسمیشن، ڈسٹری بیوشن اور سپلائی کے تمام پہلوؤں پر لاگو ہوگا۔
نیپرا کے فیصلے کے تحت اگرچہ ٹیرف میں 7.60 روپے فی یونٹ کمی کی گئی ہے، تاہم رائٹ آف کلیمز کی مد میں 50 ارب روپے کا بوجھ صارفین پر برقرار رکھا گیا ہے۔
دوسری جانب کے الیکٹرک کے ترجمان کا کہنا ہے کہ کمپنی نیپرا کے فیصلے کا تفصیلی جائزہ لے رہی ہے اور اس کے اثرات کا تجزیہ کیا جا رہا ہے۔
فیصلہ کےالیکٹرک کے جنریشن، ٹرانسمیشن، ڈسٹری بیوشن اورسپلائی بزنس کے متعدد پہلوؤں پر محیط ہے جب کہ کمپنی اس حوالے سے تمام قانونی راستے اختیار کرے گی۔
