میٹا کی مقبول میسجنگ ایپلی کیشن واٹس ایپ صارفین کی جانب سے بھیجے جانے والے پیغامات پر نئی پابندیاں متعارف کرانے کی تیاری کر رہی ہے۔
ٹیکنالوجی ویب سائٹ ٹیک کرش کے مطابق، واٹس ایپ اسپام پیغامات پر قابو پانے کے لیے نئے اقدامات کا آغاز کر رہی ہے۔
کمپنی ایک ایسے فیچر کی آزمائش کر رہی ہے جس کے تحت صارفین اور کاروباری اداروں کو نامعلوم نمبروں کو بھیجے جانے والے پیغامات کی تعداد محدود کر دی جائے گی۔
اس تبدیلی سے میٹا اپنے صارفین کو واٹس ایپ بزنس ایکو سسٹم میں اضافی تحفظ فراہم کرے گا۔
رپورٹ کے مطابق، نئے نظام کے تحت ہر ماہ ایک مخصوص حد مقرر کی جائے گی، اور اس سے زیادہ پیغامات نامعلوم نمبروں پر نہیں بھیجے جا سکیں گے۔
اگر کوئی صارف یا کاروباری ادارہ مقررہ حد کے قریب پہنچے گا تو واٹس ایپ ایک وارننگ دکھائے گا، جس میں بتایا جائے گا کہ وہ مزید کتنے پیغامات بھیج سکتا ہے۔
اس طرح صارفین کو مکمل طور پر پیغامات بھیجنے سے بلاک ہونے سے بچایا جائے گا۔
واٹس ایپ کے مطابق یہ حد زیادہ تر اسپام اور غیر ضروری پیغامات کو کم کرنے کے لیے رکھی جارہی ہے، عام صارفین اس حد سے متاثر نہیں ہوں گے۔
دلچسپ بات یہ ہے کہ اگر کوئی پیغام بھیجا جائے اور اس کا جواب موصول ہو جائے تو وہ پیغام اس حد میں شمار نہیں ہوگا۔
