لاہور(ویب ڈیسک) وزیراعلیٰ پنجاب کی ٹاسک فورس برائے پرائس کنٹرول کی چیئرپرسن محترمہ سلمیٰ بٹ نے سندس فاؤنڈیشن لاہور کا دورہ کیا جہاں انہوں نے زیرِ علاج بچوں سے ملاقات کی، تحائف تقسیم کیے اور تھیلیسیمیا، ہیموفیلیا اور دیگر خون کی بیماریوں میں مبتلا مریضوں کے لیے فراہم کی جانے والی طبی سہولیات کا جائزہ لیا۔
معزز مہمان کا استقبال فاؤنڈیشن کی انتظامیہ نے کیا۔کنسلٹنٹ ہیماٹولوجسٹ ڈاکٹر سائرہ معین نے وزیراعلیٰ ٹاسک فورس برائے پرائس کنٹرول پنجاب کی چیئرپرسن محترمہ سلمیٰ بٹ کو فاؤنڈیشن کی جانب سے فراہم کی جانے والی طبی خدمات، جدید علاج، جدید مشینری اور بلڈ مینجمنٹ سسٹم کے بارے میں تفصیلی بریفنگ دی۔
انہوں نے بتایا کہ سندس فاؤنڈیشن ہر ماہ ہزاروں مریضوں کو مفت خون اور علاج فراہم کرتی ہے اور اس عمل میں عالمی معیار کی صحت کی سہولیات کو برقرار رکھا جاتا ہے۔
ڈاکٹر سائرہ معین نے مزید بتایا کہ فاؤنڈیشن جینیاتی اسکریننگ اور بیماری کی بروقت تشخیص کے لیے نئے تحقیقاتی منصوبہ جات پر بھی کام کر رہی ہے تاکہ بیماریوں کی روک تھام کو ممکن بنایا جا سکے
دورے کے اختتام پر میڈیا سے گفتگو کرتے ہوئے معاونِ خصوصی وزیرِ اعلیٰ پنجاب برائے پرائس کنٹرول سلمیٰ بٹ نے کہا کہ سندس فاؤنڈیشن تھیلیسیمیا اور ہیموفیلیا جیسے موذی امراض میں مبتلا بچوں کے علاج، فلاح و بہبود اور نگہداشت کے حوالے سے جو خدمات انجام دے رہا ہے وہ واقعی قابلِ تحسین ہیں۔
انہوں نے کہا کہ لاہور میں اس وقت 12 ہزار سے زائد رجیسٹرڈ مریض بچے سندس فاؤنڈیشن میں زیرِ علاج ہیں جنہیں نہ صرف خون کی منتقلی کی سہولت حاصل ہے بلکہ یہاں دانتوں کے علاج سمیت مکمل میڈیکل سہولیات بھی فراہم کی جا رہی ہیں۔
سلمیٰ بٹ نے کہنا تھا کہ فاؤنڈیشن ملک بھر میں انسانیت کی خدمت کا ایک روشن استعارہ ہے اور ایسے اداروں کی موجودگی معاشرے کے لیے باعثِ فخر ہے۔
انہوں نے کہا کہ حکومتِ پنجاب تھیلیسیمیا کے خاتمے اور متاثرہ بچوں کے بہتر علاج کے لیے مربوط اور بھرپور اقدامات کر رہی ہے تاکہ انہیں بروقت اور جدید طبی سہولیات فراہم کی جا سکیں۔
معاونِ خصوصی کا کہنا تھا کہ حکومت کی ترجیح ہے کہ تھیلیسیمیا کے مریض بچوں کو بہترین علاج، خون کی دستیابی اور معیاری سہولیات فراہم کی جائیں، اور اس مقصد کے لیے حکومت نجی فلاحی اداروں کے ساتھ مل کر کام کر رہی ہے تاکہ خون کی بیماریوں کے علاج میں بہتری لائی جا سکے۔
آخر میں سندس فاؤنڈیشن کی جانب سے معاونِ خصوصی محترمہ سلمیٰ بٹ کو اعزازی شیلڈ بھی پیش کی گئی
