واشنگٹن (ڈیلی پاکستان آن لائن) امریکی صدر ڈونلڈ ٹرمپ نے کرپٹو کرنسی ایکسچینج بائنانس (Binance) کے بانی چانگ پینگ ژاؤ (Changpeng Zhao) کو صدارتی معافی دے دی ہے۔ ژاؤ نے منی لانڈرنگ میں معاونت کے الزامات تسلیم کیے تھے۔
وائٹ ہاؤس کی جانب سے جاری بیان میں کہا گیا کہ صدر ٹرمپ نے اپنے آئینی اختیار کا استعمال کرتے ہوئے ژاؤ کو معافی دی، جنہیں بائیڈن انتظامیہ کی جانب سے کرپٹو کرنسی انڈسٹری کے خلاف کارروائی کے دوران مقدمے کا سامنا کرنا پڑا تھا۔
وائٹ ہاؤس پریس سیکریٹری کیرولین لیوٹ نے کہا "بائیڈن انتظامیہ نے کرپٹو انڈسٹری کو سزا دینے کی خواہش میں ژاؤ کے خلاف مقدمہ چلایا، حالانکہ ان پر دھوکہ دہی یا کسی متاثرہ فریق کی شکایت کا کوئی الزام نہیں تھا۔”
چانگ پینگ ژاؤ نے اپنی معافی کے بعد سوشل میڈیا پلیٹ فارم "ایکس” (X) پر ردِعمل دیتے ہوئے لکھا "میں صدر ٹرمپ کا تہہ دل سے شکر گزار ہوں کہ انہوں نے انصاف اور جدت کے امریکی عزم کو برقرار رکھا۔ ہم امریکہ کو کرپٹو کی عالمی راجدھانی بنانے کے لیے بھرپور کردار ادا کریں گے۔”
سی این بی سی کے مطابق نومبر 2023 میں ژاؤ نے امریکی عدالت میں بینک سیکریسی ایکٹ کی خلاف ورزی تسلیم کرتے ہوئے بائنانس کے سی ای او کے عہدے سے استعفیٰ دے دیا تھا۔ کمپنی نے امریکی محکمۂ انصاف کے ساتھ 4.3 ارب ڈالر کے تصفیے پر اتفاق کیا تھا۔
ژاؤ پر الزام تھا کہ انہوں نے منی لانڈرنگ روکنے کے مؤثر اقدامات نہ کرکے اور امریکی معاشی پابندیوں کی خلاف ورزی کرکے امریکی مارکیٹ سے غیر قانونی منافع کمایا۔
انہیں اپریل 2024 میں چار ماہ قید کی سزا سنائی گئی تھی، حالانکہ وفاقی استغاثہ نے تین سال قید کی سفارش کی تھی۔
صدر ٹرمپ کی ترجمان نے بائیڈن انتظامیہ پر تنقید کرتے ہوئے کہا کہ "یہ اقدام امریکہ کی ٹیکنالوجی اور اختراعات میں عالمی ساکھ کو نقصان پہنچا چکا ہے لیکن اب کرپٹو کے خلاف جنگ ختم ہو چکی ہے۔”
