وفاقی حکومت نے سونے کی درآمد اور برآمد پر عائد پابندی ختم کر دی ہے۔ وفاقی کابینہ کی منظوری کے بعد وزارت تجارت نے اس سلسلے میں نوٹیفکیشن جاری کر دیا ہے، جس کے مطابق سونے کی عالمی تجارت سے متعلق معطل شدہ ایس آر او دوبارہ بحال کر دیا گیا ہے۔
نوٹیفکیشن میں بتایا گیا ہے کہ حکومت نے قیمتی دھاتوں اور زیورات کی درآمد و برآمد سے متعلق چند ترامیم کی ہیں، تاہم موجودہ فریم ورک برقرار رہے گا اور شفافیت اور خودکار نظام میں بہتری کے ساتھ جاری رہے گا۔
واضح رہے کہ اس سال مئی میں سونے کی ایکسپورٹ اور امپورٹ پر پابندی عائد کی گئی تھی۔
وزارت تجارت نے 6 مئی 2025 کو سونے کی تجارت کو منظم کرنے والا ایس آر او 60 روز کے لیے معطل کیا تھا۔
ذرائع کا کہنا ہے کہ سونےکی اسمگلنگ کی شکایت پر ایکسپورٹ اور امپورٹ پر پابندی لگائی گئی تھی۔