وزارتوں، ڈویژنز اور دیگر سرکاری محکموں پر بجلی کے واجب الادا بل پونے 3 کھرب روپے تک پہنچ گئے ہیں۔ وفاقی حکومت اور اس کے اداروں کے ذمہ ایک کھرب 26 ارب 31 کروڑ 30 لاکھ روپے ہیں، جبکہ صوبائی حکومتوں اور ان کے اداروں نے 1 کھرب 43 ارب 87 کروڑ 30 لاکھ روپے ادا کرنے ہیں۔
اس طرح مجموعی طور پر واجب الادا رقم 2 کھرب 70 ارب 18 کروڑ 60 لاکھ روپے بنتی ہے۔
وزارت پاور ڈویژن کی طرف سے پارلیمنٹ کو فراہم کردہ تفصیلات کے مطابق 31 اگست 2025 تک وفاقی حکومت اور اس کے اداروں کے ذمہ 36 ارب 40 کروڑ 40 لاکھ روپے، آزاد جموں و کشمیر کے ذمہ 63 ارب 59 کروڑ 70 لاکھ روپے، خودمختار اداروں کے ذمہ 19 ارب 96 کروڑ 40 لاکھ روپے اور لوکل باڈیز کے ذمہ 6 ارب 34 کروڑ 10 لاکھ روپے واجب الادا ہیں۔
صوبائی حکومت اور اس کے محکموں کے ذمہ 68 ارب 32 کروڑ روپے ادا کرنے ہیں۔
مزید تفصیل کے مطابق خودمختار اداروں کے ذمہ 20 ارب 64 کروڑ 70 لاکھ روپے، لوکل باڈیز کے ذمہ 7 ارب 30 کروڑ 80 لاکھ روپے، سٹی ڈسٹرکٹ گورنمنٹ کے ذمہ 12 ارب 30 کروڑ 60 لاکھ روپے اور ٹی ایم اے کے ذمہ 12 ارب 29 کروڑ 20 لاکھ روپے بجلی کے بل ادا کرنے ہیں۔
یہ اعداد و شمار ظاہر کرتے ہیں کہ بجلی کے واجب الادا بلوں کی ادائیگی میں سرکاری محکمے شدید تاخیر کا شکار ہیں۔
