ٹیکنالوجی کے شعبے کی عالمی کمپنی اینویڈیا کارپوریٹ تاریخ میں 5 ٹریلین ڈالرز کی مارکیٹ ویلیو عبور کرنے والی دنیا کی پہلی کمپنی بن گئی ہے، جو مصنوعی ذہانت کے شعبے میں اس کے کلیدی کردار کی عکاس ہے۔
اینویڈیا اکتوبر میں مختصر وقت کے لیے 5 ٹریلین ڈالرز سے زائد مالیت تک پہنچ گئی، جس کی بنیادی وجہ عالمی سطح پر مصنوعی ذہانت کے نظاموں میں اس کی جدید اے آئی چپس کی غیر معمولی طلب ہے۔
عالمی ٹیکنالوجی کمپنیاں اور ڈیٹا سینٹرز اینویڈیا کی ہائی پرفارمنس چپس پر بڑھتا ہوا انحصار کر رہی ہیں، جس کے باعث کمپنی کی مارکیٹ برتری مزید مضبوط ہو گئی ہے۔
انٹرنیشنل ڈیٹا کارپوریشن (IDC) کی تحقیق کے مطابق ڈیٹا سینٹر چپس سے حاصل ہونے والی آمدنی کے لحاظ سے مارکیٹ کا 81 فیصد حصہ اینویڈیا کے پاس ہے، جس کے نتیجے میں کمپنی کے حصص کی قیمت میں نمایاں اضافہ دیکھنے میں آیا ہے۔
اعداد و شمار کے مطابق نومبر 2022 میں OpenAI کے چیٹ بوٹ چیٹ جی پی ٹی کی ریلیز کے بعد سے اینویڈیا کے اسٹاک کی قدر میں 12 گنا اضافہ ہو چکا ہے۔
اکتوبر کی سہ ماہی کے دوران اینویڈیا کی فروخت اور منافع میں گزشتہ سال کے اسی عرصے کے مقابلے میں 60 فیصد سے زائد اضافہ ریکارڈ کیا گیا، جو وال اسٹریٹ کی توقعات سے کہیں زیادہ رہا۔
