سوشل میڈیا پلیٹ فارم Meta نے Facebook میں ایک نیا اور دلچسپ فیچر متعارف کرایا ہے، جس کے ذریعے صارفین اپنی پروفائل فوٹو کو انیمیٹ یا متحرک کر سکیں گے۔
میٹا کی جانب سے جاری بیان کے مطابق یہ فیچر میٹا اے آئی ٹیکنالوجی پر مبنی ہے، جس کی مدد سے کسی بھی تصویر کو چند سیکنڈ میں پرمزاح یا متحرک انیمیشن میں تبدیل کیا جا سکتا ہے۔
کن انیمیشن آپشنز کی سہولت ہوگی؟
بیان میں بتایا گیا ہے کہ صارفین کو پہلے مرحلے میں مختلف پری سیٹ انیمیشن آپشنز فراہم کیے جائیں گے، جن میں شامل ہیں:
نیچرل موشن
پارٹی ہیٹ
ویو (ہاتھ ہلانا)
ہارٹ ایفیکٹ
کنفیٹی ایفیکٹ
یہ آپشنز پروفائل تصویر کو زیادہ دلکش اور جاندار بنانے میں مدد دیں گے۔
میٹا کے مطابق آئندہ مہینوں میں مزید انیمیشن اسٹائلز بھی شامل کیے جائیں گے تاکہ صارفین اپنی پسند کے مطابق پروفائل فوٹو کو منفرد انداز دے سکیں۔
’ری اسٹائل‘ فیچر بھی متعارف
فیس بک نے ایک اور اے آئی فیچر "Restyle” متعارف کرانے کا اعلان بھی کیا ہے۔
اس فیچر کے ذریعے صارفین اسٹوریز میں تصاویر کو اے آئی ٹیکنالوجی کی مدد سے مختلف انداز میں تبدیل کر سکیں گے۔ مثال کے طور پر کسی عام تصویر کو خاکے یا کارٹون میں بدلا جا سکے گا۔
صارفین کو اس فیچر میں بھی پری سیٹ آپشنز فراہم کیے جائیں گے، جبکہ وہ تحریری ہدایات (ٹیکسٹ پرامپٹس) کے ذریعے اپنی تصویر کو اپنی مرضی کے مطابق اسٹائل کر سکیں گے۔
ماہرین کے مطابق یہ فیچرز سوشل میڈیا پر ذاتی اظہار کو مزید تخلیقی اور دلچسپ بنانے میں مددگار ثابت ہوں گے۔
