Table of Contents
امریکی ٹیکنالوجی کمپنی اوپن اے آئی نے اپنے مقبول اے آئی چیٹ بوٹ میں صارفین کی سکیورٹی بہتر بنانے کے لیے دو نئے فیچرز متعارف کرا دیے ہیں۔
کمپنی کے مطابق ان فیچرز کا مقصد صارفین کو ممکنہ خطرات سے خبردار کرنا اور بیرونی سسٹمز کے ساتھ غیر ضروری روابط کو محدود کرنا ہے، تاکہ ڈیٹا لیک ہونے کے امکانات کم سے کم ہو سکیں۔
لاک ڈاؤن موڈ کیا ہے؟
نئے فیچرز میں پہلا فیچر لاک ڈاؤن موڈ ہے، جو ایک آپشنل (اختیاری) سکیورٹی ٹول ہے۔ اس فیچر کو فعال کرنے سے چیٹ جی پی ٹی کے بیرونی سسٹمز، ایپس اور مخصوص ٹولز تک رسائی محدود یا مکمل طور پر بند کی جا سکتی ہے۔
کمپنی کے مطابق یہ فیچر عام صارفین کے لیے لازمی نہیں بلکہ ان افراد کے لیے مفید ہے جن کے اکاؤنٹس میں حساس معلومات موجود ہوتی ہیں یا جنہیں ہیکنگ کا زیادہ خطرہ لاحق ہوتا ہے۔
ایلیویٹڈ رسک لیبلز کیا ہیں؟
دوسرا فیچر ایلیویٹڈ رسک لیبلز ہے، جس کے تحت ایسے ٹولز یا فیچرز کے سامنے واضح لیبل ظاہر ہوں گے جو بیرونی مواد یا سسٹمز سے زیادہ رابطے میں رہتے ہیں۔ اس سے صارفین کو معلوم ہوگا کہ کون سا فیچر نسبتاً زیادہ خطرے کا حامل ہو سکتا ہے۔
پروموٹ انجیکشن حملوں سے تحفظ
اوپن اے آئی کے مطابق یہ نئے فیچرز پروموٹ انجیکشن اٹیکس کی روک تھام میں مددگار ثابت ہوں گے۔ ایسے حملوں میں ہیکرز ویب پیجز یا فائلز میں خفیہ ہدایات شامل کر دیتے ہیں تاکہ اے آئی سسٹم سے حساس معلومات حاصل کی جا سکیں۔
چونکہ جدید اے آئی چیٹ بوٹس میں ویب براؤزنگ، دستاویزات پڑھنے اور ایپ کنکشن جیسے فیچرز شامل ہوتے ہیں، اس لیے پروموٹ انجیکشن کا خطرہ بھی بڑھ جاتا ہے۔ نئے حفاظتی اقدامات اسی خطرے کو کم کرنے کے لیے متعارف کرائے گئے ہیں۔
کمپنی کو امید ہے کہ ان اقدامات سے صارفین کو اپنے ڈیٹا اور پرائیویسی پر مزید اختیار حاصل ہوگا۔
