سماجی رابطے کے پلیٹ فارم X (سابقہ ٹوئٹر) نے صارفین کے لیے نیا ویڈیو پلیئر متعارف کرا دیا ہے، جس کا مقصد ویڈیوز دیکھنے کے تجربے کو مزید بہتر اور جدید بنانا ہے۔
کمپنی کی جانب سے حالیہ مہینوں میں ویڈیو فیچرز پر خصوصی توجہ دی جا رہی تھی۔ ایکس کے پراڈکٹ ہیڈ نکیتا بیئر نے نئی اپ ڈیٹ کا اعلان کرتے ہوئے کہا کہ پرانے ویڈیو پلیئر کو اپ گریڈ کرنے کی ضرورت تھی اور اب اسے جدید تقاضوں کے مطابق ڈیزائن کیا گیا ہے۔
موبائل صارفین کیلئے خصوصی اپ ڈیٹ
نیا ری ڈیزائن پلیئر خاص طور پر موبائل صارفین کو مدنظر رکھتے ہوئے تیار کیا گیا ہے۔ آئی او ایس ڈیوائسز استعمال کرنے والے صارفین اب ایک کلک سے ویڈیو کو فل اسکرین موڈ میں تبدیل کر سکیں گے، جس کا انداز ویڈیو شیئرنگ ایپ TikTok سے ملتا جلتا ہے۔
ماہرین کے مطابق یہ تبدیلی ایسے وقت میں کی گئی ہے جب ٹک ٹاک کو امریکا میں سرمایہ کاروں کے ایک گروپ نے خرید لیا ہے، اور ایکس خود کو مختصر ویڈیوز کے شعبے میں مضبوط متبادل کے طور پر پیش کرنا چاہتا ہے۔
یاد رہے کہ 2025 میں ایکس کی جانب سے ورٹیکل ویڈیو فیڈ بھی متعارف کرائی گئی تھی تاکہ مختصر ویڈیوز دیکھنے کا تجربہ مزید مؤثر بنایا جا سکے۔
